Shillong: Ka Meghalaya Football Association (MFA) da pynbna ko wa daw sdang ko ya ka Meghalaya Baby League (MBL) 2018 kawa man leh kam chibynta ki kaam yarap bru wa leh ka Tata Trusts.
Ka MFA waka All India Football Federation (AIFF) da thmu ki wow pyntipmit ya ki khynnah kiwa nadooh 4 snem wow embynta ki ha ki yakop yalehbol ha i por wa 6 bnai yow wanrah yei sñiaw skhem, sñiawjooh ki wow yalehke wei kat wow khai khynroo ki daw ye ki u ku kyrdan ha ka yalehbol.
Ya ki khynnah wa 4-5 snem wa 5-6 snem daw yalehke ki da ka mar 5 ngut chilliang.
Ya kiwa em ha ki rta 8-9 snem, 10-11 snem wa 12-13 snem daw yalehke ki da ka mar 7 ngut chilliang.
Ya ka yakop u pynman ha ki sngi chuti wa ha ki sngi kut ka tayaw yow lait u pynwit yei lai skur ki khynnah.
Yow pynsakhiat yei snem emkaam u rah ya ki Birth Certificate wa yoh na ki CHC, PHC namo ka sorkar wei 10% kiwa yalehke toh u man ki ki kynthai ha kawi pa kawi ka Team.
Ki Football Club, ki skur, ki chong, ki dong wa kiwi kiwi ye ki u phah ya ka Team yong ki wei toh u pyllait por ki 2 kynta chitayaw ha ki 6 bnai.
U Treasurer ka MFA u Wanshanbor Kharkrang da ong u wa lyngba kani ka Baby League daw yarap wow pynwiar i sahkut ka yalehke Football hapoh ka ri India neibhah cha kiwi ki ri da sdang ki nadooh wa dang khian wei kat wow poi ki cha 12-13 snem da tip kiwon kiwa em sap.
Ya kani ka Meghalaya Baby League u sdang yaka ha ka tayaw wa khaddooh u Naisan (May) wei ya ki Final u pynkut ha u Khonchonglad (Nov) chwa wow sdang Exam ki khynnah.
Discussion about this post