Ka Shillong Lajong daw yachem ko waka Mohammedan SC kawa man leh ka yalehke nyngkong yong ka ha ka I-League 2023/24 kawa daw pynman myntu i janmiet ha Naihati Bankimanjali Stadium, West Bengal heipor 7:00 waje.
U Head Coach ka Shillong Lajong, u Bobby Nongbet da ong u wa hadien wa yoh u psiah ha ka I-League da man iwa kmen bha wei iwa yaleh wow yoh u psiah cha kani ka lympung yalehbol man ko leh iwa sahkynmoo. “Da yooluti wow sdang ya kani ka samoi deiwa biang nadooh ka yalehke wa nyngkong hanla yachem waka Mohammedan Sporting leh iwa daw ye u tip hadooh katwon da pynkhreh i.”
Da ong u leh wa kini ki bnai wa da dep toh kiwa eh bha ya ka Club neidaw wa tbian ware i por du haiden wa yoh u psiah cha ka I-League yow ye u pynkhreh kamjooh yow thied ya kiwa yalehke kiwa yatoh waka Lajong tangwa kattæ leh sñiawkmen u ya kiwa yalehke wa da yoh toh kiwa dang khynroo wei kitu kiwa da jooh yalehke leh da uiñ biang ki cha ka Club kam u Phrangki, u Kenstar, u Kynsai, u Allen wa 4 ngut kiwi kiwa na baar ri.
“Kiwa yalehke yong i katni toh kiwa joor bha i thrang wei raikut bar ya kiwi won wa yalehke ha kani ka samoi ka I-League hadien wa yoh u kyrdan naka 2nd Division ka I-League.”
Heiyatoh waka yalehke myntu, da ong u kani u man ko kawi na ki yalehke wa khor bha neibhah ka Mohammedan Sporting toh kawa khlan kawa da dep jop ya ka Aizawl FC wei da yaroh u leh ya u Coach yong ki, u Andrey Chernyshov yei lehbha ka liang yong oo.
Kani ka yalehke daw pynyoo myntu kamwa jia namo Live ha u Eurosport India wei daw ye leh u pait ha u Indian Football YouTube Channel wa Fancode ya kitu kiwa pynemkaam da ki OTT.
Discussion about this post