Jowai: Yow ye u pyndooh jait yei sih hapoh ka dong ka chnat, ki VDP yong ka Chutwakhu haka jnamiet yong ka 10 tarik da khut yachem yumut ko ya ki pulit ka Jowai kamjooh u yakrehlang khang yow ye u pyndooh jait yei sih i roi wa em hapoh ka dong ka chnat.
Ya kani ka yalang yachem yumut da pyllai da u President VDP u D. Pyrbot wei da pynman ya ka ha Indoor Hall Jrisaleiñ wei neiliang ki pulit da wan u Additional SP S. Syrti wa u SI ka Jowai Police Station u S.D. Siangshai.
Neiliang u Additional SP hawa e i klam da kyntu u ya ki VDP wa lada chem ki uwon uwon næ kawon kawon wa leh kaam sih hapoh dong iwa kongsan toh u kynmoo wow kiar nei choh i dat yow bru neibhah man i iwa eh ha kini ki sngi katni.
Da ong u wa ka VDP em hi ki ka hok wow kem lada chem ki yei leh bakla tangwa toh u pyntip cha ka aiñ yow leh ko yeiwa emkam.
Da kyrpad ya ki manbei leh wow yakrehlang wa VDP wei wow yajan lang cha u pood ka VDP yow ye u pyndooh ya ki kaam sih haka dong neibhah du ki pulit chynrang wa jooh wan wow bichaar yeiwa jia.
Neiliang u ma S.D.Siangshai da e yumut u wa toh u register ya kiwon kiwon ki baar jylla wa wan kreh hapoh ka dong ka chnat, neibhah ym che u yoo wa boonsien chwa u yut ki da leh ki ya ki kaamsih wa ha rukom.
Ha kani ka yalang da pynbait leh wow em patrolling ki pulit chirup wa ki dkhot VDP ka dong man i por.
Discussion about this post