U Chairman wa thymme ka Jowai Municipal Board, u Lasooki Lakiang da pyntip u ka Board deiwa ya krehlang wa ki NGO wa kynthup ya ka SURE waka Young Minds Collective kamjooh ka Scouts & Guides daw sdang noh ki yei pynsñiawthooh paidbah wow yabhah yei jhep hapyrdi kiwa pyut wa ki wym pyut deiwa lai cha ki dong ki chnong wa em ha Jowai.
Da khana u wa yeini da hap leh katkaam ki kyndon ka Solid Waste Management Rules 2016, kawa da kdaw wa ya ini i yabhah yei jhep namo ka Waste Segregation wym hoi u dam u leh wei ini leh daw yarap ko wow pynduna yei jhep wa poi cha ki thaw noh jhep.
Da khana u leh wa ka SURE toh kawa da dep wow lai cha kiwa boon ki thaw wow sikai kammon wow pynkylla sboh yei jhep wei yeini da rai wow leh hadien wa dep pynman ya ka yalang waka CEO ka JMB hadien wa da chem leh wa ka Municipal duna bru wakreh ko kamjooh kiwa chemphang wa ye u leh yeini.
Da khana u leh wa dang em ki Bin namo ki thaw pynlang jhep kiwa toh u saam mar ar tylli kawi ka manyung kiwa dang sah waka JMB wei ya kini leh daw saam noh yow ye u sdang noh yei yabhah yei jhep, kamtæ da khut yei ya krehlang ki paidbah yow ye u leh yeini waroh.
Neiliang u dkhot ka SURE, u Dr. H.H. Mohrmen da ong u wa nei jhep wa pyut ye leh wow chna baam sñiang kamjooh i sboh katwa ya kiwi ki jhep kiwa man kam ki jait nar, ki tin wa kiwi ye u dai cha kiwa pynlang ya ki nar jæd heithaw wow noh ki. Wei yow ye u leh yeini emkaam wow yabhah pyn na yung kamjooh na ki yaw ki haat iwa man i kitkhlieh ki Market Management Committee yow pyntikna wa da leh yeini.
Da e nongmuna u leh lada em ki yalang wa heh wa em palat 100 ngut, katkam ka aiñ lada ym yabhah chwa yei jhep, ka Municipal em hok ko wow kyntait u kit yei jhep.
Da khana u leh wa katkam ka Solid Waste Management ki karkhana hap ki wow chim ya ki Plastic yow thang ha ki tyndur yong ki.
Neiliang u Chenmiki Laloo, Secretary ka Young Minds Collective da khana u wa chnong Iongpiah toh kawa sdang wow yabhah yei jhep kamtæ neilliang yong ki daw puræ bniah ki yeini yow tip kammon krehkaam kaam ini wei iyi i eh wa mih na ini.
Kamtæ da ong kini wa i leh yeini waroh toh wa manda lai noh yei jhep daw em sa du kiwa pyut kiwa ye u tlep chapoh khyndaw kiwa daw kylla sboh won hadien wei yow pyndooh noh leh yei pyrkhat wa i jhep toh i yong ka Jowai neibhah ini i jhep toh i yong ka Ri-loom Jaiñtia hi waroh kawi.
