Jowai: Ka seiñ Jaiñtia Football Academy (JFA) kawa em i thmu wow pynku yei sap yalehke Football ki khynnah kiwa nadooh i rta wa dang khian chynrang wa kynthai, ynne ka sngi da wai ki ya ka Coaching Camp namo ka chlem e sikai ka wow sdang ha kini ki sngi wow wan, haka yalang wa pynman ha Yungwalieh ka Tpep Pale.
Katkam ki kyntien wai phang u Ryum Khonglah u General Secretary ka JFA, da ong u wa ya kani ka seiñ da sdang hadien wa yoo wa ym em wa yahluti ya ki khynnah wa em i sap yalehke wow pyn janai ya i sap yong ki wei lyngba ka seiñ ha ki bnai wa da dep da dep thooh ko ya ki khynnah wa em yei sap.
Ki khynnah kiwa da chah jied wow yoh sikai toh kiwa em hapoh ka rta 10 snem, 12 snem wa 14 snem. Yaki khynnah da pdiang hadien wa da mynjur lang ki bei ki kpa neidaw wa hadooh kamwa 3 snem u chah sikai ki hapoh kani ka seiñ, tangwa ym thut ka puræ puthi yong ki neidaw waka esikai u pynman ha ki sngi chuti.
U R.D. Syngkon u General Secretary ka Tpep Pale Dorbar chnong, uwa man kam uwi u Referee wa da lai kylleiñ ki thaw, da ong u wa da yoo u yei yoh nong kiwa yalehke bol wei ym man de ko kawa ke wei da man ko ka kyrkhu ya ka yung ka sem yong ki wei boon leh kiwa da im ja na kani ka kaam, kamtæ yooluti u wa kani ka Coaching Camp daw pynyoh myntoi ko ya kiwa daw ku chakhmat.
U kongsan ha kani ka sngi wa man leh u President ka JFA hi, u Paul Synnah hei klam yong oo nyngkong dooh da khana u yei lai luti yong oo kawa da pynman ya oo wow embynta ha kani ka seiñ neibynta wow yarap yaka imlang sahlang.
Da ong u wa kani ka seiñ man ko kawa nyngkong dooh ha ri-loom Jaiñtia kawa man kam ka skur wow khut wow lum ya kiwa dang khian wa dang stiñ ki kjat ki kti kiwa smat wow bood ya iwa sikai.
Chooh chooh da ong haroh u wa man ko ka thong ha i im wow pynemkaam ya ki sap wa da e u Blai khamtam ha kini ki por wow yang kreh sorkar man ko kawa eh bha.
Kamtæ da yooluti u wa lyngba i krehkaam ki bei ki pa kani ka seiñ u lai ko cha khmat.
Discussion about this post