U Montri Rangbah ka jylla, u Conrad Kongal Sangma da kyntait u wow klam iyi iyi hajrong i pynbait thymme ya ka aiñ bhah kaam namo ka Reservation Policy, tangwa da ong u wa i yaklam wa ka sorkar da booh ko u man bait hajrong i pynkrehkaam ya ka Roster System.
Ka dhab ki Montri namo ka Cabinet ka sorkar Meghalaya Democratic Alliance (MDA-II), ynne ka sngi da sdang ki wow ya phyllu yei rukom pynkrehkaam ya ka Roster System hapoh ka Reservation Policy.
U Conrad Sangma da pyntip u wa ha ka yalang ki Montri da batai bniah kammon wow pynkrehkaam ya ka Roster System wei hadien ini da em i paan pynche leh na ki Montri, wei khaddooh da rai wow lai chakhmat ya ini i batai bniah wei wow pynsñiaw won ha ka yalang yong kiwa emlang hapoh ka sorkar MDA wei wow bood won sa i pynsñiaw cha waroh ki seiñ saiñpyrthai ha kani ka 19 tarik wei hapoh 10 sngi daw batai leh cha waroh deiwa embynta nadooh ki seiñbhalang, kiwa yahkhmat chnong wei kamjooh kiwa yahkhmat niam.
Hawa kylli hajrong i dawa yong ka Voice of the People Party (VPP) wow pynbait thymme ya ka Reservation Policy, da ong u wa ya katni ka sorkar ka yaklam bait ko thij yei pynkrehkaam ya ka Roster System wei kani ka pynkrehkaam toh kawa da pteiñ wei daw lai ko kamjooh hi.
