Ka National Thermal Power Corporation Limited (NTPC Ltd.), kawa man kawi na ki karkhana ka sorkar pyrdi kawa em hapoh ka Ministry of Power, da sdang ko wow krehkaam wa ki karkhana pynmih khyndaw-bilat kiwa em ha kylleiñ ka ri wow pynpoi (Supply) ya i Fly Ash kam chibynta wow pynkrehkaam 100% yong i tpai wa mih nei thang mooyong heipor wa pynmih bordiñ.
Neiliang ka NTPCL da krehkaam ko wa ka Indian Railways’ wow kit ya ini i tpai deiwa khooid.
Neiliang ka NTPC Ltd. da ong ko wa ka NTPC Rihand toh kawa nyngkong dooh na ki karkhana yong ka ha Uttar Pradesh wow phah ya i tpai mooyong cha ki karkhana khyndaw-bilat.
Kani ka karkhana ha Rihand ini wadep da phah ko hadooh 3,834 Metric Tonnes (MT) i tpai mooyong ha ki 59 tylli ki BOXN Wagon namo ki daba rel cha ka Dalmia Cement (Bharat) Ltd.’s ha Nagaon, Assam wei chwa ini da pynpoi cha ka karkhana ka ACC Tikaria (U.P), Kymore (M.P) wa Ropar (Punjab).
Ha u snem 2019-20, hadooh kamwa 44.33 Million Tonnes i Fly Ash wa da pynemkaam ha kiwa boon ki liang wei wa ka NTPC pynmih ko hadooh 65 Million Tonnes i tpai ha ka chi snem heiwa na ini kamwa 80% (kamwa 52 Million MT) toh i Fly Ash.
Katkam wa man katni ya ini i tpai mooyong da pynemkaam hei wow chna khyndaw-bilat, moo-it, sarok wa kiwi kiwi.
