Ki dukan, ki Mall, ki Restaurant ha Delhi u sdang biang ki u wai hadien wa hiar kiwa yoh COVID-19 cha wa duna dooh ki hadien 3 bnai. Ki dukan u wai ki man-ka-sngi nadooh mynstep heithaw ka Odd/Even kamwa da leh ini wadep. U Chief Minister Arvind Kejriwal, da ong u wa ini toh kamwa pyrchang donhi chitayaw tangwa daw pynrkhiñ biang lada ku biang kiwa yoh COVID-19.
Ki dukan toh kiwa daw wai nadooh 10 waje i step hadooh 8 waje i miet da pyntip u Kejriwal.
Ki Restaurants kiwa ini wadep da wai du wow song baam, da chah wow chong baam ki bru deiwa chah u em ki bru 50% na iwa hoi.
Ki yaw leh toh kiwa chah u wai deiwa em 50% kiwa chongdai heiwa u chah u wai ka wi ka yaw chi sngi ha ki Municipal Zone. Ki thaw ah sniooh wa ki Spa u man hi ki kiwa khang.
Ki yung krehkaam sorkar ye ki wow wai pura katwa ki yong ki bru samen won toh 50%. Ka Delhi Metro wa ki Bus leh toh 50% donhi iwa ye u kit bru.
Waroh ki School, ki College toh u man ki kiwa khang.
Ki Swimming Pool, Amusement Park, Water Park u man ki kiwa khang wei ym pu chah wow pynman ya ki yalang paidbah. Ki thaw niam da chah u wai tangwa ym chah wow psiah kiwa lai mane.
Ynnin ka sngi, ha Delhi da em du 213 ngut kiwa yoh COVID-19 iwa duna dooh hadien 3 bnai, deilang won waroh dapoi 14,30,884 ngut kiwa da dep yoh ya uni u khñiang hapoh Delhi. Kiwa dang yap da em ki 28 ngut iwa da pynpoi waroh 24,800 ngut.
Ini toh iwa da duna bha ha Delhi heiwa ha u April-May da em hadooh 28,000 ngut kiwa yoh chi sngi iwa da ktah bha yei ye ki Hospital wow pynbiang Oxygen, thaw thiah wa i dawai.
