Ka India da kreh ko wow sdang noh ya ka uiñke suwari da ka jhaad khian lyngba ki wah ka ri kawa tip hei ktien pharæng kam ka “River Cruise” wei kani u man ko leh kawa jrong dooh ha pyrthai kawa lai luti 3,200 Km lyngba ki 27 tylli ki wah wa em ha ki 5 tylli ki jylla ka ri deiwa lai leh lyngba ka ri Bangladesh wei daw wai ya ka ha ka 13 tarik uni u bnai da u Montri Rangbahdooh ka ri, u Narendra Modi ha Varanasi.
Ya kani ka River Cruise daw pynkrehkaam da ka MV Ganga Vilas kawa nyngkong wow leh ya kam kini ki jait kaam.
U Sarbananda Sonowal, Union Minister of Ports, Shipping & Waterways da pyntip u wa kani ka MV Ganga Vilas Cruise toh yow wailaad ya ki kaam uiñke suwari lyngba ki wah kawa ym jooh em leh nachwa yow yoh u maad ki bru yei mahajon ki chnong ki thaw ka ri nadooh ka niam, i kynja mynsien, ka dustur riti wa ki khloo ki kjam.
“Nadooh na Kashi cha Sarnath, na Majuli cha Mayong, na Sunderbans cha Kaziranga, kani ka Cruise toh kawa daw sah kynmoo yanom wei ngait O wa ini hapoh i yahkhmat u Prime Minister Modi daw man ko ka rta wa thymme ya ki kaam uiñke suwari ka India wei i kreh kam chibynta ka Act East Policy deiwa pynyoo yei kaam.”
Kani ka Cruise toh kawa chimpor 51 sngi u pyndep deiwa lai cha ki 50 tylli ki thaw uiñke suwari nadooh ki World Heritage Site, ki National Park, ki River Ghat wa ki sorbah kam ka Patna ha Bihar, ka Sahibganj ha Jharkhand, ka Kolkata ha West Bengal, Dhaka ha Bangladesh wa Guwahati ha Assam.
Kini ki jhaad khian ka MV Ganga Vilas toh kiwa jrong 62 meter wei kiwa heh cha chrooh 12 meter wei toh kawa em le mala wa 18 tylli ki thaw sah neibynta 36 ngut ki bru.
Hawa sdang nyngkong daw em leh 32 ngut kiwa na Switzerland kiwa daw embynta wow lai na Varanasi cha Dibrugarh wei da antaad wa daw poi ki ha Dibrugarh ha ka 01-03-23.
