U Montri ka sorkar wa pait yei kaam psan dakha, u Alexander Laloo Hek da pyntip u wa ka chnat da thung ko ya ka Fact Finding Committee wow thooh yeiwa sakhiat hajrong i pynemkaam ya i dawai Formalin ha ki dakha wa da wanrah na baar ka jylla.
Ynne ka sngi, neiliang ka synjuk kiwa khayi dakha, ka Khasi Jaiñtia Fish Whole Seller and Retailer Association da yachem ki ya u Montri wow pynsñiaw yei phylla wa chem wa em dawai Formalin ki dakha wa da wanrah na baar ka jylla, khamtam na Andhra Pradesh.
Da ong u wa neiliang kiwa khayi pynyoo ki leh ya oo ka bui (Report) kawa pynyoo wa nadooh Andhra Pradesh ym em pynemkaam Formalin ha ki dakha wa wanrah na katai ka jylla.
U Hek da ong u wa kani ka Fact Finding Committee da e kti ha u Secretary ka chnat Fisheries, wei ya ka bui wow pynpoi hapoh ki kajiak sngi wow wan.
Hajrong i dawa kiwa khayi dakha wa ka sorkar toh u phah ko ya ki bru cha Andhra Pradesh yow chem yeiwa sakhiat, neiliang u Montri da ong u wa lada emkaam wow leh yeitæ daw leh yeitæ neibynta i myntoi ki paidbah.
