Jowai: Hadien u slap wa joor haka tayaw wadep uwa da neh boon sngi hapoh ka jylla kamjooh ha Ri-loom Jaiñtia, da sakhi wa boon ki luti syngkeiñ, ki thaw rep thaw riang da chah pynjæd chah tympra ki hei bor u slap nalor ki yung bru wa kiwi iwa da wanrah yei dooh nong wa khroo u paidbah.
Neiliang u Wyrta hadien wa da sangeh u slap wei i bneiñ da rang i, da yohlaad wow lai luti chaki bynta ka Raliang Elaka kawa haap hapoh ka Laskeiñ C&RD Block kawa em ha kani ka thaaiñ kiwa boon ki bru wa chaniah ki hei kaam rep. Kamtæ hei lai luti da sakhi wa kani ka thaaiñ leh toh kawa da chah ktah bha ki thaw rep ki pynthor ki hali wa kynthup nadooh kiwi ki mar rep.
Heiyatoh wei chahktah yong kani ka thaaiñ, da yohlaad u yaklam wa u Dolloi ka Elaka Raliang u C. Lyngdoh uwa da pynsñiaw i diaw deiwa ong, u snem 2020 toh u snem i chah tynjooh wa khroo ki paaid warep ka thaaiñ neibhah i chah tympra ki pynthor ki hali wym toh de iwa ke.
“Heipor chara leh da chah pynjæd ki pynthor hali nei hiar u slap wa joor wei da chah tlep ki ha u moo u chyiap, ki warep hap ki u thooh ki laad ki luti kammon wow pynkhooid wow pynchna yaki thaw rep, tangwa sñiawsih won wa du hadien kattu katni por da wan biang i tynjooh wei sih biang ki thaw rep nalor wot u kba uwa da heh wei da toh i por wow ah leh da chah pynsih lut ha u slap,” ong u C. Lyngdoh.
Khana u wa katkam i ood ki paidbah ka thaaiñ, i dooh nong nei chah ktah man iwa da boon bha, wei uni u snem toh u snem i chah tynjooh ha waroh ki liang nadooh i puræ puthi ki khon ki kti, i chahktah hei khih i khan, ki yaw ki haat wa kiwi kiwi.
Heijooh i por kam uwi uwa em ki hali ki pynthor wei kiwa da chah ktah joor leh, pynsñiaw u wa ha uni u snem wymtip de sa du katwon churia hi eh u yoh ya u khoo u kba.
Kamtæ kyrpaad u yaki bor sorkar wow yarap chimkhia ki yeini i chah ktah u paidbah dei wow thooh ki laad ki luti wow e yarap neibhah nalor wa chah pynsih ki thaw rep, sa ki jhoor, u khoo, u kba leh chah pynsih.
