Ka Ministry of Home Affairs (Disaster Management Division) da thoh ko cha waroh ki Chief Secretary ka jylla wa u e yarap poisa lyngba ka State Disaster Response Fund (SDRF) heiyatoh wa i poor u khñiang COVID-19.
Ka sorkar pyrdi da ong ko wa deiwa pyrkhat yei poor u COVID-19 hapoh ka ri kamjooh yei pynbna ka World Health Organisation (WHO) ya i poor u COVID-19 ha pyrthai kawa da man katni kam ka ‘Global Pandemic’ da chim yaka rai wa hapoh ka ri wow pynbna ya kani ka kaam kam ka “Notified Disaster” yow ye u yoh yarap poisa naka SDRF.
Cha kiwa ha yung kiwa yap na u COVID-19 daw yoh ki T. 4 lak wa kynthup ya kitu ki bru wa kreh wow e yarap (Relief Operation) wei da yoh ki ya uni u khñiang deiwa pynsakhiat da ki bor sorkar.
Yaka bai sumaar ya kiwa yoh ya u COVID-19 toh u booh dor da ki sorkar jylla.
Heiyatoh won wa i khang kset (Quarantine), i pynbiang thaw sah wa chipor, i baam, ki sula, i sumaar ha ki Quarantine Camp wa kiwi kiwi kiwa yatoh wa kani ka kaam, chong ko hei emkaam katkam wa kheiñ daka State Executive Committee (SEC) yow pyntikna yei wym poor uni u khñiang hadooh 30 sngi. Ka SEC daw rai ko leh hadooh katwon tylli ki Quarantine Camp wa emkaam, hadooh katwon sngi wa katwon ngut ha kawi ka Camp. I yarap sumaar ym toh u pynemkaam naka National Health Mission (NHM).
I lutsan wow booh yaki Testing Laboratories, ki Thermal Scanners, Ventilators wa kiwi kiwi kiwa emkaam toh u sai naka SDRF donhi ym toh naka NDRF katkam wa emkaam wa da kheiñ daka SEC.
I lut wow thied yaki tiar ki tar ym toh u palat ko 10% ka poisa wa da booh neibynta wow pynlut chi snem yong ka SDRF.
Discussion about this post