Ynne ka sngi ka dhab ki montri ka sorkar jylla namo ka Cabinet da chong pyrkhat ko hajrong ka phang wa yatoh wa ka karkhana pynmih khyndaw-bilat ya kawa tip kam ka Mawmluh Cherra Cement Limited (MCCL) heiwa da rai wow tyrwa ya i krehlang wa ki karkhana samen ha ka MCCL.
Neiliang u montri rangbah ka jylla, u Conrad K Sangma da ong u wa ka MCCL em ko chiboon i eh i khoo heiyatoh wa ka poisa poilaiñ heiwa ka sorkar emkaam ko wow pynlut hadooh kamwa T. 190 klur neibynta wow pynkhai im biang ya ka.
Kamtæ hajrong ini waroh neiliang yong u Conrad da pyntip u wa ka sorkar da rai noh ko wow tyrwa yakrehlang namo wow thooh lok wow pynkhai im biang ya ka MCCL.
Kam wow kdaw heini ka MCCL toh ka karkhana pynmih khyndaw-bilat ka jylla wei ha kini ki snem wa dadep da sdang doohnong ko hadooh wa poi u pood wa ymye de ko wow su ya ka tulop cha ki wakreh yong ka.
