Ynne ka sngi da mih i awri ha ka Toll Plaza ha 7 Mer Pasyih neidaw wa pyrchah ya i sdang pynkrehkaam ya ka FASTag heiwa da mih i sahkut kari wa joor iwa da pynbor ya ki bor District wow hiar cha kani ka thaw wei wow pynlait mynkna ya ki kari waroh.
Ha i janmiet won ki bor District da khut yaklam ki ya ki seiñbhalang wa ki sahep na ka NHAI wow yaklam hajrong kani ka kaam. Ya ka yalang da pynlai da u DC ka West Jaiñtia Hills, u Garod LNS Dykes hei emlang u SP ka District u Bikram D. Marak wa ki Magistrate ka District.
Ki seiñbhalang kiwa da em ha ka yalang kynthup ki ya ka JSU, MPUF, FKJGP wa kiwi kiwi na ka District.
Ka yalang da man ko kawa chongchit heiwa da pynsñiaw ki seiñbhalang yei pyrchah yei pynkrehkaam ya ka FASTag wa i daiñ kuna ha kani ka Toll Gate khamtam ya ki kari kamai heiwa ki sahep ka NHAI won da yaleh ki wow pynsñiawthooh hajrong i dor wa i rai ka sorkar pyrdi hajrong ini i kaam.
Khaddooh na ka yalang da rai wow chim 275 na ki kari samen ha ka chi bnai katkam wa pynmih hukum ka sorkar.
Kawi won ka rai toh wow pynlait ya ki kari kamai (Taxi) wow su ki ya ka dan ha ka Toll Plaza, wei wow su katkam i dor warim iwa man T. 30 chi sngi.
Da phah leh ya ka NHAI wow pyntip pynsñiawthooh paidbah bha hajrong ka FASTag wei wow booh ya ki thaw wa dai ya ki FASTag wow pynsuk ya ki paidbah.
Da emkaam leh wow pyndait ya ki FASTag katkam ka rai ka sorkar neibhah wa khlem ki FASTag ymye wow leh ya ki kot kari kam ki RC, Permit, Insurance wa kiwi kiwi.
Hajrong kini waroh, neiliang ki sahep ka NHAI da kular ki wow rah ya ini cha ki bor wa hajrong wow yaklam pynbait ya ini i kaam.
