Hadien wa ka Synjuk Waheh Chnong Jowai ynnin ka sngi da rai ko wow khang ya ki yaw ha sor Jowai neidaw wym ye u pynkhooid ya ki jhep na ki thaw wa pynman yaw wei ini da pynsñiawsih i ya kiwa boon ki paidbah kiwa chongdai neidaw wa i khang ya ki yaw daw ktah bha i ya ki neidaw wa tieñsar ki leh wa ya em biang i khang chnong neidaw ka khlam COVID-19.
Ynne ka sngi ha Iawthymme kawa man ka yaw yong ka JHADC da chem wa da khat chi bhah yong i jhep na kani ka thaw wei ki dukan waroh da man ki kiwa khang.
Hawa yaklam wa u Eveningstar Teron uwa man u EM wa pait ya ka chnat yaw ka Council da pyntip u wa ya i jhep na kani ka yaw daw khat pynkhooid mynstep ka Bibar (9 tarik) khnang wow ye u wai biang ya ka Iawthymme ha ka 10 tarik.
Ha ki le tylli kiwi tawon ki yaw ha Jowai kiwa kynthup ya ka yaw Seiñraij wa ka Yaw Chor (CNI) da sakhi wa da pynkhooid ya i jhep katwa ha ka yaw Chyiap dang sah i jhep sa kajiak heiwa da yooluti daw ye noh u pynkhooid myntu.
Hawa yaklam wa u President ka Synjuk, u Alan Niangti da ong u wa katkam wa pyntip ki Committee yong ki le tylli ki yaw wa kynthup ya ka yaw Seiñraij, Yaw Chor wa Yaw Chyiap wa da khooid i jhep kamtæ ym khang de ya ki ha kani ka 10 tarik (Sngi Musiang).
Heiyatoh wa ka Iawthymme da pyntip u wa daw yang hadooh mynstep (9 tarik) wei lada khooid i jhep na kani ka thaw, kani ka yaw leh u wai noh ko nadooh ka 10 tarik.
Chooh chooh da ong u wa ka Synjuk da klam che ko wa u wai ya ki yaw toh du hadien wa khooid i jhep.
Heijooh i por ka Synjuk da kyntu ko ya kiwa chongdai kamjooh leh kiwa wan yaw wow man ki kiwa lehkhooid khnang wa ki yaw ki haat kiwa man ka pliang-ja ya ki khon ka Ri-loom Jaiñtia wow man ki kiwa khooid wa jngiar wow ye u wanrah ya i chait i khiah.
