U Montri wa pait ya ka chnat Tourism, u Paul Lyngdoh da pynbna paidbah u ya ki tamasa kut snem ka jylla ki wow sdang nadooh ka 14 tarik u Naichiphaw.
Kini ki tamasa kynthup ki ya ka Megha Kayak Festival, ka 4×4 Offroad Challenge ki wow man u Naichiphaw, ha u Khonchonglad (Nov) daw kynthup ki ya ka Shillong Cherry Blossom Festival, ka Me-Gong Festival wei ha u Kmaichonglad (Dec) daw em ka Winter Tales.
U Paul da pyntip u wa ha ka sngi sdang ka Cherry Blossom 2025 daw wan ka Nora Fatehi kawa man kam kawa chaad wa Actress ka Bollywood kawa daw embyntalang. Da ong u wa i pynlut neibynta ka Cherry Blossom Festival ha uni u snem dapoi ko Rs. 4 klur wei da yooluti u wa kini ki tamasa ka jylla daw khriñ ki rap boon kiwa uiñke suwari.
Ini wa dep da pynbna leh ya u Jason Derulo wa ki The Script ki wow tem wow rwai ha ka sngi nynkong ka Cherry Blossom ha uni u snem.
U Paul da khana u wa ha ki tamasa kiwa da pynman ha u snem wa dep, ka sorkar da pynlut ko Rs. 23.5 klur wei i mih na kini dapoi ki ha waroh ki liang hadooh Rs. 133.42 klur.
Discussion about this post