Da: U Soolangki D. Laloo
Ya u Waheh Kambell Chullai da kha ha ka 8 tarik Thohlakhmi (February) 1939 wei da ieh u yeini i pyrthai chongwasa ha ka 16 tarik Naiynru (June) 2012, wei hei lai luti heini ha sla khyndaw pyrthai kam u khynnah, u khynroo, u waheh da leh u chiboon ki kaam kiwa mih nei sap i chemphang wa sarot yong oo kam i chna ya ka Camera chondur, i chna ya ki rot wa phylla heipor Behdieñkhlam, i pynmih pyrthai ya ka Khnap Thangbru (Eco-friendly Crematorium) wa kiwi kiwi.
U Waheh Kambell Chullai toh sakhiat U Khai- U Piar ka Ri – ka Jaitbru, uwa da e sap kyrpang u Trekirot heiwa nei sap wei chemphang yong oo da pynmih pyrthai u ya ka Khnap Thangbru namo ka Eco- Friendly Crematorium kawa da man i kyrkhu wei burom wa khroo ya ka ri wa ka jaitbru wei kawa e myntoi leh liang wanang ya ki bru wa pynemkaam ya ka kamjooh yada ko leh yei man i long ka ramaw heiwa neiliang ka sorkar leh hadien i pynchong yurim da tipmit wei yaleh chooh chooh u pynkroo yei naam i pyrtuid yong oo hakhmat ka pyrthai.
Kdar ha ki 13 snem nachwa ym ye u mylliñ lyndet wa ynne ka sngi ka 16 tarik Naiynru man ko ka sngi wow sah kynmoo sah khanatang, ka sngi kawa u lyoh doom i sniawsih sñiawdiaw ya ka yung ka sem, ya ki khon ka Raij Jowai wa kamjooh ya waroh ki khon ka Ri Lephaw Syiem- Khadar Dolloi wa hapyrdi wa dang dawa i por ka juk wow yoh ka pyrthai u sakhi u yoo yei sap wei chemphang wa sarot kiwa man i kyrkhu wei myntoi ya ka imlang sahlang, ieh syndet u Waheh Kambell Chullai yeini i pyrthai chongwasa.
Pynchongnia chongyurim yei sap wa kyrpang yong u Waheh Kambell Chullai wow pynmih pyrthai ya ka Khnap Thangbru (Eco- friendly Crematorium), yoo sakhiat wa man i kyrkhu wa khroo ya ki khon ka Niamtre ha kylleiñ ki chnong ki thaw heiwa da pynsuk ya kawi pa kawi ka manyung wow pyndep ya ka niam ka rukom yong ka thang ka riñ manda em i haap i oor, i pat rangbah rangsan. Ha lyndet ini iyi iyi waroh i kyrkhu wa da yoh, mih i dak kylli wow booh hei thij i pyrkhat yong ki khon ka Niamtre, ka ri wa ka jaitbru, yi wan i kaamram ki pateiñ ka juk wa che wa stat wow pynkhroo chooh yei naam i pyrtuid u Waheh Kambell Chullai?
Eco-Friendly Crematorium dachna,
Kylleiñ ki chnong ki thaw da bna.
Khmat bru kat wa yoo yei man yong ka
Du kiwa yaroh yei sap iwa paka.
Chiboon kiwa niawliang niawtang
Ya ki kaam wa sah wa yooluti wa yang
I por ya me won ym chah de i,
Hukum Blai da toh wow lai neini.
Wh. Kambell Chullai im i pyrtuid i naam yong me
Chihajar ngooh wei sñiaw makhane.
Discussion about this post