Ka VPP Khliehriat Circle ynne da pynman ko ya ka yalang paidbah ha Teilang Playground, Dkhiah West yow yaklam yei sih palat u sarok NH-6 yow thooh ki luti yow pynbor ya ka sorkar wow pynchna ya uni u sarok.
Hadien wa kut kani ka yalang, neiliang u D.L. Rymbai, President ka VPP Khliehriat Circle da ong u wa hanla duna ki bru wa wan cha ka yalang, da chim ya ka rai wow ya krehlang waka yakhih wa daw pynman da ka KSU East Jaiñtia kawa daw pynman ha ka 25 tarik uni u bnai.
Da khana u wa ynne da wan wow chimbynta da ki seiñ kiwa kamai kari, ki seiñbhalang wei ha ini i yaklam da rai wow mylliñ yei yaphær Party, yaphær seiñ heiwa ha ka 25 tarik u ya chimbynta lang ha ka yakhih wa da khut da ka KSU East Jaiñtia Hills Unit deilang waka KSU Narpuh Circle.
Da ong u leh wa ini toh yow pynyoo yei yatylli neibhah lada chim rai wow pynbna yakhih da kawi won daw lai won ko cha kawi ka bynta, kamtæ u leh yeini deiwa mylliñ yei sñiaw Party wei sñiaw seiñ.
Ki daw wa da kyrchaan ya ka KSU toh ka kawa da dep yahkhmat yei yakhih wei da dep leh wow kular ka NHAI ha ka wow pynchna hapoh 6 tayaaw nadooh u Naisaphra wei hadooh katni ym pu em leh ko iyi iyi wow pynchna ya uni u sarokbah wei hadien ini da pynbna yow pynman biang yei yakhih, kamtæ ka Party leh u e ko yei kyrchaan wa pura.
Wei lada ka sorkar ym ap ko yei dawa hadien ini i yakhih wei ym pynyoo ko ya ki dak hadien chi sngi ar sngi daw hap ko wow maad dei yakhih wa rap khor, da ong u D.L. Rymbai.
Kam wow pynkynmoo wa ka KSU EJHDU da pynbna ko dei yakhih wow thiah sarok ha ka 25 tarik ha Khliehriat.
Puræ leh: Dei thiah sarok wei sangeh kari pynbna ka KSU East Jaiñtia neibynta u NH-6
Discussion about this post