Ka seiñ Khooid Ya Ka Wah Myntdu, kam chibynta i lai luti u yaleh wow pyndooh ya ki Plastic, wei hadien wa chem yei syrtap ki Plastic wa noh khlem akor ki paidbah cha ki chariñ wa tooid cha wah Myntdu iwa ye u wanrah i maa yaka chnong Jowai, kamtæ haka 12 tarik uni u bnai da pynman ko yei yalang wa ki warep ha pynthor kba ka chnong Ialong, West Jaiñtia Hills.
Ha kani ka yalang da yaklam ki hajrong wow thooh ki laad yow pynneh pynbha wei pynyoosuk yaka wah Myntdu kamjooh ki chnat yong ka yow im i rep i riang wei yow yoh ka um, ka la-ær, u khoo u kba ka jaitbru ha ki pateiñ wow wan.
Ha kani ka sngi da yoh i klam na u Snarmon Lato uwa chong chnong ka Jowai, neitæ u D.N. Suchiang, General Secretary Khooid Ya Ka Wah Myntdu wa u Khroo L Pariat, President ka Khooid Ya Ka Wah Myntdu ha ka yalang wa pynlai da u Bishar Shylla, Vice President ka seiñ.
Neliang ka seiñ ki warep na Ialong wa kynthup ya u P. Phawa, President, u D. Dhar, General Secretary, ka Sngi Dhar wa kiwi da sñiawsih ki hajrong wym kyrchaan ka sorkar jylla yei chah pynjæd ki hali yong ki hei bor ka rymaw ha u snem 2020, wei khamtam i yarap kam ki sboh wa ki dawai mrad ki wym jooh yoh ki.
Ha kani ka yalang da chim haroh ki ka rai u yakrehlang waka Khooid Ya Ka Wah Myntdu hei yakhun u pyndooh yaki Plastic ki jhep, wei u dawa leh na ka sorkar u pynbha ko ya ki dooid, ki thlu um wa kai cha ka wah Myntdu, khnang yow im i manbru kiwa sah ha talawiar ka wah Myntdu.
Ka seiñ da kyntu kyrsu haroh ko yaki bru wow sñiawbha ki wow dam u noh yei jhep wa pyut hapoh ki muna Plastic tangwa u noh cha ki kpær ki kchu syntu yow kylla sboh ki.
Da ong leh wa i noh haki Plastic daw wanrah ko i kjut wa maa yaka chnong ka dong manda joor u slap ha ki bnai wow wan neibhah manda tooid ki cha ka wah Myntdu daw chah ktah kani ka um wa psa yaka chnong Jowai kamjooh u khoo u kba wa pynemkaam u rep lyngba kani ka um.
