Shillong: Ka Shillong Lajong daw yakhun pyrchah ko yaka Rangdajied United haka Final ka Meghalaya State League 2019 kawa daw pynman ha Teilang Phawa Stadium ha Khliehriat ha kani ka 21 tarik. Ka yalehke u sdang ko heipor 12:45 i sngi wei daw pynyoo yaka ha Prag News – Channel 1966 (Tata Sky), 638 (Airtel), 850 (Videocon), 1525 (DishTV) wa ha ki Cable Network.
Waroh arliang da poi ki cha ka Final khlem rem ki wei daw yooluti ki wow pteiñ ki ya ini yow poi hadooh wa kut khlem rem chisien leh.
Ka Lajong da jop ko yaka Group A hadien wa jop ko soo sien wei da ya drawn chisien wei da jop suk ko ha ki Semifinal 10-1 (First Leg) wa 11-1 (Second Leg) pyrchah yaka Druma Sandruma kawa na Group D.
Ka Rangdajied da jop lut ko ya waroh 4 tylli ki yalehke yong ka na Group C. Haka Semi Final (First Leg) pyrchah yaka Sutnga da kut ko da 0-0 tangwa haka Second Leg won da jop suk ko da 6-1 yow psiah cha ka Final.
Kini ki arliang kiwa naka Shillong Sports Association da poi Final ki jar jiar i rukom heiwa ka Lajong da thap kool ko awjan ha iwon iwon i por wa kwah ko katwa ka Rangdajied won duna i thap kool ko tangwa pyntikna ko yei jop. Ka Lajong da thap ko 47 kool wei da chah thap ko 4 kool katwa ka Rangdajied da thap ko 21 kool wei da chah thap ko 2 tylli.
Ka SLFC ha kani ka kynti ym em chim wai ko ya kiwa yalehke neiwon neiwon wei da pynyalehke ko da kiwa pynjop hi yaka Shillong Premier League ynnin u bnai. Ka Rangdajied kawa rem haka Lajong haka SPL, da chim wai ko ya kiwa yalehke yow pyndap yeiwa emkaam ko. Uwa boon dooh wa thap kool yong ka toh u Donlad Diengdoh (6 kool) wei da pynyoo ki haka Second Leg Semi Final pyrchah yaka Sutnga heiwa da em 6 ngut kiwa yalehke wa thap kool kiwa ye u wow pynkjutkhlieh yaka Lajong.
Ha chwa wow sdang ka Final daw em ka pynwyrngia nadooh i por 11:00 waje i step da ki chaad wa ki rwai heiwa u Banker Kharkongor uwa chna ya i sur ka MSL 2019 daw wan rwai u. Daw pynkup burom leh yaka Meghalaya Boys’ Team kawa jop yaka Sub-Junior National Football Championship ha uni u bnai.
Ha i dur: Ki Team Managers deilang wa ki Jersey ki liang yong ki hei emlang u MSL 2019 Tournament Director u Wanshanbor Kharkrang wa u Match Commissioner u Andrew Suting
Discussion about this post