Ka seiñ wa tip kam ka Seng Pynroi Pynbha Amlarem Sub-Divisional Amlarem, ha ka 31-12-2022 da pynman ko ya ka yalang ha pchem ka Yung Hall ka Syiem Jingsuk Amlarem heiwa da khut ya ki waheh chnong, ki seiñbhalang wa kiwi bru waheh yong ka thaaiñ War Jaiñtia.
Ha kani ka yalang, ka seiñ da khana ko yei yaleh yong ka nadooh u snem 2018 ter-ter hadooh katni wow pynyoh ya ka Sub-Divisional Hospital ha Amlarem kawa man leh kam ka Sub-Divisional Head Quarter. Da khana leh wa em le tylli ki jait Hospital nadooh ki PHC, CHC wa Sub-Divisional Hospital wei ka Sub-Divisional Sub-Division toh kawa da ye u booh kawi tangwa toh u booh leh kawi ha Amlarem. Kamtæ da pyrchah yei pynku kyrdan ya ka Jarain PHC cha ka Sub-Divisional Hospital wei i daw wa kongsan dooh toh wa ka Jarain PHC em ko cha baar yong ka Headquarter ka Amlarem Sub-Division.
Ka seiñ da ong leh wa ka chnong Amlarem toh kawa em hapyrdi yong ka Sub-Division iwa daw pynsuk leh ya ki paidbah wei yow booh ya kani ka Hospital da yoh leh yei thaw wa ym duna 10 Acre i heh wa da e da u Hat Dhar, Chairman ka Kur Dhar Sohtken Shmiashyiang, Amlarem Sub-Division wei yeini da pyntip leh cha ka chnat i chait i khiah kamjooh cha u MLA ka thaaiñ u Lahkmen Rymbui wei ka chnat da dep ko wow lai chakhmat katkam ki aiñ tangwa iwa sñiawsih toh wa u MLA won da leh u mar dei khangtleiñ deiwa pynku kyrdan pathan ya ka Jarain PHC cha ka Sub-Divisional Hospital i wym chongnia iyi iyi leh.
Hadien wa da yaklam wei da pyrkhat sani bha, ka yalang da rai ko wow dawa na ka sorkar wow pyndam noh ya ini i pynku kyrdan ya ka Jarain PHC wei wow booh hi ya ka Sub-Divisional Hospital ha Amlarem. Da rai leh wow yaleh neibynta ini khlem da chong ngiah hadooh wa ka sorkar u e ko yei dawa wow booh ya kani ka Sub-Divisional Hospital ha Amlarem.
I pyntip na u Babyson Pakyntein, Chairman Seng Pynroi Pynbha Amlarem Sub-Division, Amlarem.
