Ki kattu katni ki seiñ ki warep daw yakhun ki kam chibynta wow kyrchaan ya ka Constable CISF kawa da thaap ya kawa jop MP na ka BJP ka Kangana Ranaut ynnin ha Chandigarh Airport.
Ki seiñ ki warep da pynbna ki wow yakhun deiwa lai kjat wei da khut ya ka Insaaf (I Hok) ha Mohali, Punjab mynstep ka sngi wow dawa wym hoi u pynchitom ya kani ka Constable, ka Kulwinder Kaur. Da dawa ki leh wow takit bha yeini wa jia.
Kam wow kdaw heini ka Kangana da jop MP ko Mandi, Himachal Pradesh, wei da chah thaap ko heipor wa leh Security Check ha Chandigarh Airport wei i daw wa leh ka Constable yeini toh wa ka Kangana beiñ ko ya ki kynthai na Punjab heipor wa yakhun ki warep.
Katkam i Video wa da poor, kani ka Constable kawa 35 snem da ong ko wa ka bei ko leh embynta ko ha i yakhih ki warep tangwa ka Kangana da ong ko yakhun ki toh du wow yoh Rs. 100.
Ki seiñ ki warep kam ka Samyukta Kisan Morcha (Non-Political) wa ka Kisan Mazdoor Morcha ynne da pynbna ki wow kyrchaan ya ka Kulwinder Kaur.
Neiliang ka CISF da beh kreh chipor ki ya ka Kulwinder Kaur wei da sdang ki ya i takit hajrong ini iwa jia katwa ki pulit da kem ki ka.
Discussion about this post