Ki seiñbhalang wa em hapoh ka jylla ha ka yalang kawa da pynman ynnin ka sngi, da pynkhai im biang ki ya ka Confederation of Meghalaya Social Organisations (CoMSO) kawa man ka satri yong ki seiñbhalang na Khasi, Jaiñtia wa Garo Hills hajrong ka yurim wow yada ya ki tre chnong nei wan psiah laitlan ki bru kiwa na baar.
Kini ki seiñbhalang kiwa emlang hapoh ka CoMSO toh ka Hynniewtrep Youth Council (HYC), Jaiñtia National Council (JNC), Jaiñtia Students Movement (JSM), Confederation of Ri Bhoi People (CoRP), ka Garoland State Movement Committee (GLSMC), United Achik Social Economic Forum (UASCJF), Achik Progressive Association (APA) wa uwi uwa kreh monsñiawbha na Garo Hills, u Cherion Momin.
Hadien wa dadep wow ya phyllu ha ka yalang wa da pynman ha Conference Room ka ICSSR, NEHU, Shillong, neiliang ka CoMSO da rai ko wow pynkhlan yei dawa u yada ya ki tre ri tre muluk, Khasi, Jaiñtia wa Garo nei wan psiah ki baar ri na Bangladesh.
“Lada ym em kawi ka sur kawa mihlang na waroh ki tre ri tre chnong, yoo kamwa ka sur wa i dawa yong i daw sahkut ko du heini ha Ri-loom ka Khasi wa Jaiñtia yong i. I tip wei sñiawthooh i yei maa wa yang ya i ki tre ri lada ym chim ya kawon kawon ka laad ka luti wow dawa na ka sorkar ya kitæ ki aiñ wow kdoh u khoom yei wan psiah kulmar ki bru kiwa na baar, khamtam ki nong Bangladesh kiwa da sdang wow psiah cha kani ka jylla yong i”, da ong u President ka HYC, u Roykupar Synrem hawa yaklam wa ki laad pathai khubor.
Da ong u wa ka yalang da rai ko wow dawa pynkrehkaam ya ka Inner Line Permit (ILP) kawa dang sahteiñ hadooh kattæ. Da ong u wa lada ka sorkar India wa ka sorkar jylla ym ye ki wow e ya ka ILP, toh u e da ka aiñ MRSSA, 2020.
Kawi won ka phang wa ka CoMSO da rai ko wow dawa na ka sorkar India toh wow pynkylla noh ya ka Schedule Tribe Order 1950 kawa tipmit ya ki jaitbru ri-loom ha kani ka jylla, neibhah ha u snem 1950 ym pu em yoh ya ka jylla Meghalaya, heiwa heitu i por dang emlang hapoh ka jylla Assam, wei hawa wanrah yei pynkylla ya ka ST Order ha u snem 1976, ka sorkar India da chim ko ya ka jooh ka Order yong u snem 1950, kawa da tipmit lut ya waroh ki jaitbru ri-loom ha kani ka jylla iwa ym du ki Khasi, Jaiñtia wa Garo.
Da ong u wa ini da pyndooh ko yei hok ki tre chnong kiwa man kam ki Khasi, Jaiñtia wa Garo hadooh wow chah knieh yei khyndaw u chyiap wa ka khayi pateiñ ha kiwi ki jaitbru ri-loom katwa ki Khasi, Jaiñtia wa Garo ym yoh ki ya kam ini i tipmit ki jaitbru ri-loom ha kiwi ki jylla.
U Roykupar da ong u leh wa ka CoMSO daw chim ko leh ya ka phang hajrong i pynkylla wa 126 ya ka 6th Schedule ka Constitution ka ri India.
Discussion about this post