U Esron Marweiñ uwa man uwi na kiwa yajan bha wa u (L) HS Shylla, ynnin da pynbna u wow yakhun ya ka Election MDC kam u kyrtong samen na Nongthymmai Constituency.
Hawa pynbna yeini i thmu, u Marweiñ da ong u wa i daw wa mih u chakhmat wow yakhun ya ka Election toh hadien wa da pait u yei man i long ka District Council kawa da hiar dor wei sdang wow tlot hadooh wa da mih i kyntien wow pyndooh noh ya ki District Council.
Da ong u wa hadien wa thooh bniah ya ki daw, ka Para 12A hapoh ka Sixth Schedule toh i daw wa tlot ka District Council. Da ong u leh wa i bor wa ki District Council wa yoh lyngba ka Sixth Schedule toh iwa khlan hadoo kattæ-kattæ nadooh wow chna aiñ hajrong i khyndaw u chyiap, i mantre, i synchaar khadar, wow e bor ya ki Syiem wa ki Rangbah Shnong, wow bichaar ya ki mukotduma ha ki kasari ki ADC wow khrong dan wa kiwi kiwi.
Da ong u wa i mih wow yakhun ya ka Election MDC toh wow pyndam noh ya ka Para 12A.
Chooh chooh da ong u wa i em ka Para 12A da pyntkhoh i chiboon ya i krehkaam ki District Council neibhah ki aiñ ka District Council ym im ki manda tynkhooh wa ki aiñ ka sorkar.
Hawa kylli, u Marweiñ da ong u wa i daw wa rai u wow yakhun kam u kyrtong samen toh neidaw wym em yumut wow psiah næ yakhun MDC na ki seiñ neibhah ha ki District Council ym em ki aiñ wow khang yei yut seiñ.
Hawa kylli hajrong i ong ka Voice of the People Party (VPP) ya ki kyrtong samen wa toh kam kiwa sap du ka banian, da ong wa ka ‘Uniform’ ymtoh du ka sulapoh, tangwa ka banian leh toh ka ‘Uniform’ hawa yalehke Sports.
“Kitu kiwa sap ya ka sulapoh da yoh chwa ki ya ka ‘Uniform’ ye ki wow em chwa yeiwa saiñdur kammon wow kreh ki, tangwa i kiwa sap da ka banian i chim i ya ka lyngkor wei i rai hi i wow yoh ya ka ‘Uniform’ kawa i hi pynchong yurim i”, da ong u Marweiñ.
Discussion about this post