Ki heh ka Bharatiya Janata Party (BJP), Meghalaya da pynsñiaw ki wow yaklam wa ki Montri ka sorkar pyrdi wa ya kiwon kiwon ki Exam thung kreh ha ki chnat ka sorkar pyrdi ha ka jylla Meghalaya wow pynman bait ha ka jylla hi.
Ki heh ka BJP da yachem ki ya ki heh ka North East Indira Gandhi Regional Institute of Health and Medical Sciences (NEIGRIHMS) ynnin ka 7 tarik, hadien wa kani ka thaw sumaar da thmu ko wow pynman ya ka Interview thung kreh Nurse ha Guwahati, ya kawa da pynsangeh noh kani ka Hospital wei da phah pynman noh hapoh ka jylla hi.
U Vice President ka Bharatiya Janata Yuva Morcha (BJYM), u Wallambok Khongwir da ong u wa neiliang ka BJP da kyntu ko ya ki bor ka NEIGRIHMS wa ki Company kiwa khut yaleh kreh wow pynman yaka Interview kreh neibynta ki khynroo hapoh ka jylla hi.
Da ong u wa hawa lai cha Delhi daw yaklam ki wa ki Montri ka sorkar pyrdi wow kyntu ya ki wa lada pynman ya ki Exam thap kreh ka sorkar pyrdi kiwa em ha Meghalaya toh u pynman bait hapoh ka jylla yow lait i lut i sep wei yow chngaaiñ ki wei ka sorkar jylla leh toh u pynbiang ki yei thaw pynman Exam.
