Ka seiñ KSU Narpuh Circle hapoh i yahkhmat u President u K.S. Suchiang, u Asst. Finance Secretary Jaintia Hills Unit u Shaniahskhem Dkhar wa ki dkhot ka KSU Jaiñtia Hills da lai yachem ki wa u DC ka East Jaiñtia Hills District u E. Kharmalki hajrong i yoh ka Star Cement ya ka Environmental Clearance na ka Ministry of Environmental Forest & Climate Change ka sorkar pyrdi wow tih moochuni ha chnong Brichyrnot, East Jaiñtia Hills.
Ka seiñ da lyngngoh ko wa kammon ka Star Cement da yoh ko ya ka Environmental Clearance wot hadien wa ki le tylli ki Public Hearing wa da pynman ym em mihsoh ki hadien wa da pyrchah da kiwa boon walang nadooh ki seiñbhalang waphær waphær wa ki paidbah yong ka thaaiñ.
Ka seiñ da paan ko ya ka Report yong ka Public Hearing wa da pynman ha ka 21-11-2020 ha pchem u DC tangwa neiliang u DC da ong u wa hap wow leh da ka RTI.
Ka seiñ da pynsñiaw ko wa lada ka Star Cement u yoh ko wow tih moochuni na katai ka thaw, i maa wa yang ya ki pateiñ wow wan ko kawa chyrkhei bha wei daw pynjakhlia ko leh ya ka Wah Lukha waka Wah Lunar kiwa em hajan katai ka paar moochuni.
Kamjooh leh da ong wa daw ktah ya ka Narpuh Wildlife Sanctuary wa ya ka Eco Sensitive Zone. Ka seiñ da kylli ko ya ka sorkar jylla wa ya ka sorkar pyrdi wa iyi em cha kylla wow e bor wot hapyrdi i pyrchah ki paidbah.
Ka seiñ da ong ko leh wa lada kammon kammon leh daw chim ko ya ka luti wow pyndooh noh ya katai ka Clearance wa da e deiwa pynrap wa da lyngngoh leh yei klam u Montri Rangbah u Conrad K sangma uwa da ong wa ym toh i kamram yong ka sorkar jylla wow e bor u tih moochuni wei toh i kamram ka sorkar pyrdi.
Ka seiñ da kylli ko wa kammon ka sorkar pyrdi da e bor ko ya ka Star Cement khlem i tip yong ka sorkar jylla. Kamtæ neiliang yong ka seiñ daw booddien ko wow thooh yei sakhiat ya ini i leh thlah ka sorkar jylla.
