Ka Harijan Panchayat Committee da pyntip ko wa da rai wow kyntait ya ka High Level Committee Report kawa da phah leh da ka sorkar Meghalaya wei daw yaleh pyrchah ko ya ini deiwa ong wa ini toh i leh pyrchah ya ka aiñ da ka sorkar wow kyrriah ya kiwa sah ha ini i thaw.
U Secretary ka Harijan Panchayat Committee, u Gurjit Singh da ong wa u yaleh pyrchah u yei kamtre ka sorkar yei thaw ki Sikh ha ka Harijan Colony namo ka Them Metor ha Iew Mawlong wa em da ki spah tylli ki manyung kiwa da sah palat 200 snem ha ini i thaw.
Da ong u wa daw yaleh hadooh wa kut i mynsien wei u yap leh neibynta i thaw yong ki wei ym chah ya kiwon kiwon ki kaam wa pyrchah aiñ wa i thombor da ka sorkar Meghalaya.
U Gurjit da ong u leh wa ini i kaam toh iwa dang em hapoh i bichaar ka Supreme Court wei daw man i tyngkheiñ aiñ lada lai ka sorkar chakhmat.
Da kdaw u wa ini i thaw wa heh 2.5. Acre toh iwa da e sñiawbha da u Syiem ka Hima Mylliem cha ki longchwa man chwa wei ym em de kiwi kiwa em hok ya ini i thaw. Deiwa pynrap wa ya u Syiem ka Hima Mylliem wa katni da chah pynbor ya oo yow chim mantre biang ya chiboon ini i thaw tangwa katkam ki aiñ leh ym ye de u wow chim biang ya ini i thaw wa da dep e sñiawbha cha ki longchwa manchwa.
Chooh chooh da ong u wa i ya mynjur hapyrdi ki le liang kitæ u Syiem ka Hima Mylliem, ka chnat Urban Affairs waka Shillong Municipal Board toh kawa ym em kjat wow yieñ wei man ko leh pyrchah ya ka aiñ.
Da pynbaad u leh wa ka sorkar da pyrchang ko wow pyntieñ ya ki deiwa chah ya ki bru wow thombor ya ki yung ki sem yong ki ha u snem 2018 wei hadien wa rem ko hapoh ka yung bichaar da pyrchang won wow leh dei bor, deiwa ong leh wa wot ya ki bru wakreh ka sorkar ym ye wow kyrriah yabor cha iwi won i thaw.
Heiyatoh wa ka High Level Committee wa khlieh da u Symbood Montri Rangbah, u Prestone Tynsong, da ong wa toh kawa leh chilliang nadooh wa sdang pyrchah ya ki Sikh wa sah ha ini i thaw wei i rai ka Cabinet toh u noh chapoh tin jhep wa man ki pyrchah ya ka aiñ.
Da ong u leh wa ka Cabinet ym sñiawthooh ko yei sdang ini i kaam heiwa ki Sikh da chakri ki ya ka sorkar tangwa katni da chah beh deiwa pynbor ki kattu katni kiwa kwah ya ini i thaw iwa da man katni iwa da yaknieh bha ki bru.
“Ym sñiawthooh ileh wa ka sorkar jhan ko hadien wa da phah da ka Meghalaya High Court wow neh chwa kamwa man namo ka Status Quo ha ka hukum wa da pynmih ha ka 09-04-21 hadien wa da yaleh mukotduma,” da ong u Gurjit deiwa pynrap leh wa da phah wow pynsangeh ya ki kaam ka High Level Committee kawa da seiñ ha ka 04-06-18 kawa da wanrah ya ka Report yong ka ha ka 28-09-21.
Heiyatoh wa i ong u Montri Rangbah, u Conrad Sangma hadien wa kut ka yachem ki Montri namo ka Cabinet Meeting wa daw chimkti noh ya i thaw hapoh chi tayaw, u Gurjit da ong wa da em ka hukum wa pynmih u Justice Sen ka Meghalaya High Court ha ka 15-02-19 kawa da ong wa yow pynbait ya ka kot wa mantre namo ka Title Deed, hap wow yaleh da ka mukotdukum ymtoh deiwa yaklam waka sorkar Meghalaya.
Kamtæ da ong wa nadooh iwa jia ha u 2018, da dep wan ka National Commission for Minorities, ka National Human Rights Commission wa ka National Commission for Safai Karamcharis kiwa da hukum leh wow pynsangeh chwa yei thmu wow kyrriah wei ini waroh pynyoo ko wa i thmu wow leh katkam wa da chem da ka High Level Committee wow kyrriah ya ki wareh sorkar wa kiwi de kiwa em ha ini i thaw man ko pyrchah ya ka aiñ wa kiwi de deilang wa ka hukum ka yung bichaar.
