U National Vice President ka National People’s Party (NPP) uwa man leh u Symbood Montri Rangbah ka jylla, u Prestone Tynsong da ong u wa lada u President ka Meghalaya Pradesh Congress Committee (MPCC) u Vincent H Pala em sabut u wa ka NPP ka lum poisa ko pyrchah ya ka aiñ na ki Check Gate wa ki khyrdop Covid, toh u ujor u da ka FIR.
Ynnin ka sngi u Pala da pynbaad u wa ki Check Gate wa ki khyrdop Covid ha ka jylla da kylla ATM ki yong ka NPP waka UDP wow lum poisa neibynta ka Election chiteiñ samoi.
Hawa kylli, u Prestone da ong u wa u Vincent Pala hawa pynbaad u, ye u man wa da em chwa u ya ki sabut kiwa biang, wei lada em u, ileh ym lai ujor u cha ki Police Station, deiwa pynrap chooh chooh wa ym kwah u wow yania palat, tangwa lada em i pynbaad wei lada man ko iwa sakhiat, ka Congress kawa em chiboon ki bru kiwa tip ya ka aiñ da toh wow lai bait ki katkam ka aiñ, wei lada ym em ki sabut da man ko du kam i pynbaad khlem yurim.
Hawa yatoh won wa i klam u Pala wa ka sorkar synrop Meghalaya Democratic Alliance rap piah ko bar ya ka seiñ Congress wei katni i yakhun leh man ko mar pyrchah para ki ha ka Election chiteiñ samoi, u Prestone da ong u wa itai i klam u heh ka MPCC toh i klam khynnah, neibhah ka sorkar MDA hadooh katni skem wei yatylli ki.
Da ong chooh chooh u wa u President ka Congress toh u sñiawthooh u lada toh da ka sorkar wa yahkhmat da ka Congress ha Delhi nachwa ka UPA, ka sorkar NDA wa yahkhmat da ka BJP kanti næ ka sorkar MDA hapoh ka jylla Meghalaya, hawa em ka Election, ki hap ki wow yakhun, næ u Pala mut u wow ong wa ha ka sorkar UPA em du ka Congress samen, wei ym mut wa kiwi kiwa em ha ka sorkar ym ye ki wow yakhun Election.
Hawa yatoh wa i pynbaad ka Congress pyrchah ya ka NPP, u Prestone da ong u wa lada ka Congress ka em ko yei sakhi kiwa biang hajrong i pynbaad da toh wow lai ko cha ka aiñ, deiwa pynrap wa kam uwa yahkhmat ym sñiawphylla de u yei pynbaad ka Liang Pyrchah ya ki seiñ kiwa emlang ha ka sorkar MDA, la man ya ka NPP, UDP, PDF, NCP næ ya ka BJP.
Da ong u wa ka Congress katni ym em ko ya ki phang wow lai yalap cha ki paidbah ha kani ka Election chiteiñ samoi, neibhah katni ym ye de ki wow lai cha ki paidbah yow yoh chna sorkar, wei ini da pynman ko ya ki wym yoh de ya ki phang wow klam lait noh du wow pynbaad.
Uwa yahkhmat ka NPP da ong u wa ki paidbah yong ki le tylli ki Constituency ki sñiawthooh ki wa da dep rai leh yeiyi wow jied neibhah wa ki emkaam ki ya i kaam pynroi wei hawa ki emkaam ki ya ki kaam pynroi ini mut wa ki emkaam ki ya uwa mihkhmat uwa em ha ka sorkar.
Puræ leh: Ki thaw Check COVID da man ki kam ki thaw khrong poisa, ki ATM ka UDP waka NPP: Vincent
