Ynnin ka 27 tarik, ka Amita Sangma da ujor FIR ko ha ki pulit ka Madanrting deiwa phah lang ya kani ka ujor cha u Chief Secretary ka jylla, cha uwa yahkhmat yaka liang pyrchah, u DGP, ka DC ka East Khasi Hills, DMR, DTO wa kiwi kiwi deiwa ong wa chem ko ynnin ka sngi ya boon tylli ki Truck kiwa kit mooyong palat ya u pood wei ki wym biang ki kot ki sla, ki Challan kamjooh ki wym em bood yei kit katkam ki kyndon ka NGT.
Haka FIR da ong wa da chem wa em boon tylli kini ki Truck toh kiwa em ha Lad Smith, Umphyrnai, Lam Lyer ka East Khasi Hills District.
Chooh chooh da pyntip hawa yaklam wa ki kattu katni kiwa yah truck, da pyntip ki wa ym em ki yaki kot ki sla wei dang yang ki yaki dalal wow pynbiang ki yaki kot ki sla wei da kit ki neibynta ki ‘High Level’ kamtæ ym emkaam leh yaki kot ki sla.
Kamtæ da kyrpaad yaki pulit wow chimkhia ya ini i kaam yow tip lada ki kot ki sla toh kiwa biang wei lada u mooyong wa kit ki toh uwa da dep lai lilam wei wow pynchitom ya kitu kiwa leh pyrchah yaka aiñ yow lait leh u dooh nong ka sorkar.
