Ka seiñ HANM Jaiñtia Zone ynne ka sngi da lai e FIR ko pyrchah ya uwa kreh ka Topcem, u Arun Kejriwal wa uwa krehlang wa oo ha kani ka karkhana hadien wa da yoh u yoo ya ki sabut ha ki laad pathai khubor yei pynemkaam ki ya ki kyntien sih wei da pynchit ki leh wow dat u bom ya kiwa wan pyrchah ya ka Public Hearin kani ka karkhana.
Da ong leh wa da tikna wa kini ki Video wa da mih toh ki yong sakhiat, kamtæ da kyntu ya u Officer In-Charge ka Lumshnong Police Station wow kem ya kini ki bru wei wow pynngat ki hapoh ki kyndon aiñ wa biang.
Ka seiñ da thoh ko leh cha u Director ka Meghalaya Cements Limited wow beh kreh syndon ya u Arun Kejriwal wa uwa krehlang wa oo ha kani ka karkhana hajrong ini wa da leh ki heipor wa pynman ya ka Public Hearing wow pynchit ya ki pulit wow thombor ya kiwa chong chnong kiwa da wan wow pyrchah.
Da ong leh wa lada kwah yei suk i saaiñ hapoh ka thaaiñ toh u beh kreh noh syndon khlem pynslem ya kini wei lym kamtæ daw pynman dei yakhih wei lada jia iwon iwon, ka seiñ ym kitkhlieh ko.
Discussion about this post