Shillong: Kiwa synchaar yong ka Raid Kongthong ynne ka sngi da ujor FIR ki ha ka yung krehkaam u Superintendent of Police ka East Khasi Hills, pyrchah ya le ngut ki baar jylla kiwa yah bakla deiwa lai e dorkhat cha u Lat ka jylla ha ka tayaw wa da dep hawa yatoh wa ki kaam pynlai chnong ha ka Raid. Kini ki le ngut ki bru wa ka Raid da ujor ki toh kiwa tip pyrtuid kam u Prantush Sarkar, u Mridul Das wa u Binayak Roy.
U Secretary ka Raid Kongthong, u Stogent Lynrah da ong u wa i ujor ya kitai ki le ngut toh hajrong i pynbaad wa i mih na kitai ki bru kawa man pyrchah ya ka chnong wei da yah bakla ki, heiwa da ktah leh ha i yaphær niam tangwa iwa sakhiat toh wa ka Raid nadooh nachwa da thung ya kiwa synchaar da ki rangbah na ki soo kur, kitæ ka Kur Lynrah, Majaw, Khongsit wa Pohnong.
Da ong u wow pynbaad ya kiwa synchaar chnong da jied du ya kiwa man Christan toh iwa bakla, neibhah wa hadooh katni ka chnong ka yatylli ko wei da jied ya kiwa yahkhmat du na kini ki soo kur. Neiliang kiwa yahkhmat yong ka Raid Kongthong da beiñ joor ko ya ini i pynbaad kitai ki le ngut, wei neiliang u Stogent da ong u wa itai i ong yong kitai ki bru toh du wow batai stat, heiwa da kyntu leh ya ki paidbah wa ym toh wow sñiawthooh bakla neibhah ka chnong ym em ko i yaphær niam wei ki ya tylli ki wow wanrah ya ka synchaar khadar kawa khooid wa suk wa saiñ.
Katkam i pyntip u Stogent, i pynbaad yong kitai ki le ngut ki baar jylla toh heiyatoh wa i jia ha u snem wa da dep, heiwa i pynbaad ya kiwa yahkhmat chnong kiwa toh ki Christan da khang pyrchah ki ya ka lehniam ha ka Raid, deiwa pyntip wa hajrong ini i kaam, neiliang ka Raid da dep ko wow pynche wa i khang ya katai ka lehniam toh neidaw wa chim ya i pyrtuid yong ka Raid wei lada wan ki da kawi ka kynhun ka Raid ym em thut ko.
Kiwa yahkhmat ka Raid Kongthong da pyntip ki leh wa ym em ki baar jylla kiwa chong wa sah ha katai ka thaaiñ, tangwa i wan tuklar yong kitai ki le ngut toh du neibynta wow yoh myntoi samen.
U Stogent da ong u leh wa neiliang ka Raid manda yoh ko wow pynman ya ka dorbar daw chong bichaar leh ya kitai ki bru kiwa rah ya ki khubor pynchit, neibhah wa kiwa synchaar yong ka Raid ki tipmit wei tip ki ya kitai ki bru. Da ong u wa ka Raid ym maap ko ya kitai ki bru neibhah du wow ap u suki daw ktah ko ya ka chnong wa ya kiwa wan hadien.
