Jowai: Ki ar tylli ki seiñbhalang wa kynthup yaka Hynniewtrep Student Union (HSU) wa ka All Jaiñtia Hills Social Welfare Organization (AJHSWO) hadien wa yoh yutip ki kawa tikna wa em uwi u baar jylla uwa tip pyrtuid kam u Abdul Hamit uwa naka chnong Barpeta Assam uwa chong dai syiar ha soo mer hajan ka laad sarok Jowai Bypass wa ym em biang u ya ki kot ki sla kiwa biang khamtam ka Trading License neidaw wa ya kani ka dukan da seiñ wei da mantre u ka.
Hadien wa ki ar seiñ da lai sylli ki ya kani ka dukan dai syiar da chem sakhiat wa u tre ym em u yaka Trading License wa kiwi kiwi ki kot ki sla wa emkaam, kamtæ neiliang yong ki da e syndon ki daka FIR pyrchah ya uni u baar jylla ha Jowai Police Station wei da sñiawphylla ki ar seiñ wa hadien wa da dep booh yaka ujor da em kawi ka manbei ka Pnar kawa da wan kam wa ka toh ka tre yung wa chimwai u tai u baar jylla deiwa kam ko leh wa i khih leh man i i yong ka wa kreh da u tai u baar jylla.
Chooh chooh neiliang ki ar seiñ da pynrem joor ki ya kani ka manbei wa yada ko ya uni u bru khlem da pyrkhat yaka mynried ka jaitbru wa chitroh yong i, deiwa ong wa lada em boon kam kini ki kynthai wa yada ya ki baar jylla, sa du katwon ka jaitbru yong i daw wiar noh ko, da ong u President ka HSU u K. Rymbai.
Ki ar seiñ da dawa ki na ki bor yong ka aiñ wow sñiawbha ki wow chimkhia wow leh katkam ki kyndon aiñ pyrchah ya uni u baar jylla, wei daw lai yachem ki leh wa u EM wa pait yaka Trading License ka JHADC wow ujor pyrchah ya kani ka bru wa leh Benami ya uni u bru.
Discussion about this post