Ka Syrbang Lapasam kawa chong chnong ha Mowkaiaw da pynbaad ko wa da chah leh dusmon i lyngkha ko hapoh i yahkhmat u Shaniah Lamare, u Ardamirang Rymbai, u Franklin Hadem, u Humaialang Lapasam, u Dangawansuk Sungoh wa u Jim Hadem.
Kini ki bru kiwa chong chnong ka Mowkaiaw hi, ha ka 2 tarik uni u bnai heipor kamwa 10:30 i step da wan ki deilang wa ki tiar pynmynsoo wei da rah ki leh deilang waka pooh chiloom kawa khlem em Number kawa mantre da u Rishanmi Suting wei da khloh khyndang ki ya ka lyngkha ka Syrbang wa da em u kba wa da ih wei da jan hoi u ah hadien kattu katni tayaaw.
Ka Syrbang da ong ko wa ini i leh yong kini ki bru da pyndooh nong ko ya ki kam ka manyung kiwa da kreh chitom wow thung wow sumaar ya uni u kba uwa em ha Umrashlum wei ya uni u kba da thung yow baam uwa da dooh noh na ini i leh kini ki bru ki wym em de yei sñiaw hadooh wow leh pynsih ya u kba.
Chooh chooh da ong wa ini i leh kini ki bru da pynyoo che yei biej yong ki na ki kaam wa leh ki, wei lada kam ki toh i thaw yong ki ileh wym wan pyntip ki heipor wa thung wei bet ya u kba wei ileh da leh ki yeini manda jan toh u ah kba.
“Nga kam ka tre wa da chah ktah neini kyrpaad O ya ki bor wa toh u pait wow sñiawbha ki wow bichaar ya ini neibhah nga da dooh nong bha O i wym ye pyrkhat de neibhah nga toh u baam O ya uni u kba,” da ong ka Syrbang.
Da pyntip leh wa heipor wa jia ini da pyrchang wow yaklam wei wow khang ya kini tangwa da maham wei da beh ki ka wei da tba kti ki ka wei da klam ki da ki kyntien khlem akor iwa man pyrchah yei man ko kam ka kynthai.
“Ini i leh yong ki da pynkthang yei mynsien yong nga neibhah da pynsih ki ya u Syiem Khoo la kam wa kini ki bru ym baam de ki da u khoo; baam ki da u moo wa nood ki u leh hadooh kat deini,” da ong ka Syrbang.
Da pyntip ko wa da dep ko leh wow e FIR pyn ynnin hi ha Raliang Police Station.
Discussion about this post