Shillong: Ynne i step da em ki damok ki wym tipmit kiwa da theh da i kynja mobil ha ka top um ka chnong Nongkseh, Upper Shillong.
Kani ka um kawa da wai khlem poi pyrkhat wa da em wa theh da i mobil da pynsyir ko ya ki paidbah wa pynemkaam ya ka ya boi ktah ka ki.
Hawa yaklam wa u Rangbah Shnong ka Nongkseh, u A.S. Thangkhiew da ong u wa ki bor chnong da ujor ki ha Jhalupara Police Outpost wow kem ya kiwa emkti heiwa da pyntip u wa da chem wa ini i mobil heipor 8 waje i step hadien wa uwa wai um ym da leh khang u ya ka heiwa hadien da yoo u wa ka um lati mobil ko.
Da ong u wa heipor wa wai um heipor 6:30 i step ym em poi pyrkhat u wa daw em mobil ko neibhah kani ka um toh kawa wan bait na Lum Shyllong.
“Ka chnong Nongkseh em ko ka thaw pynlang um wa chniam kamwa 40,000 hadooh 50,000 litre kawa da pynkrehkaam nadooh u snem 2015, ya kani ka thaw da kær bha,” da ong u Rangbah Shnong.
Da pyntip u wa daw pynkhooid noh ya kani ka thaw wei kat wympu khooid ka um ympu ye u saam paidbah ya ka neibhah wa ye ko u ktah yei chait i khiah ki paidbah deiwa kyntu ya kiwa diang ya kani ka um hei step wow pynkhooid ya ka chwa wow pynemkaam ya ka.
Da pynrap u leh wa yoo lakam wa da em wa theh hadooh kamwa 10-20 litre i mobil wei da pyntip u wa ha ini waroh da chah ktah palat 330 tylli ki manyung ha ini iwa jia.
Mar tip yeini iwa jia neiliang u MLA ka Mylliem uwa man leh u montri sorkar, u Hamletson Dohling da lai pait u yeini heiwa da chem wa ka um ym man de ko kawa hoi wow pynemkaam deiwa ong wa daw pynkhooid ya kani ka thaw pyn ynne ka sngi khnang wa ki bru ym chah ktah ki hawa pynemkaam ya ka um kawa daw sdang saam biang na kani ka thaw.
Da beiñ u leh ya kiwa emkti ha ini i kaam deiwa kyntu ya ki pulit wow leh yeiwa emkaam heiwa da phah leh ya ka PHE wow test ya kani ka um lada man ko kawa bha wow pynemkaam chwa wow saam ya ka cha ki chnong kam ka Lummawbah, Lawsohtun, Umlyngka wa kiwi kiwi.
(Feature image for representational purposes)
Discussion about this post