Shillong: Ka Hills Farmers Union (HFU) ynne ka sngi hadien wa yoh ujor ki na ki warep kiwa lai dai ya ki mar rep ha Iewduh, Shillong da chem wa da em i chah ah kilo be-aiñ ki mar ki ha kiwa khayi mar wei da lai yachem ki ya u Deputy Commissioner ka East Khasi Hills, u PS Dkhar wow chimkhia hajrong ini i chah lehbeiñ ki warep.
Hawa yaklam wa u Allfondbirth Kharsyntiew, General Secretary ka HFU da ong u wa i chah ah kilo khiar ha ki mahajon ha Iewduh da man i chawa palat iwa da ksih dor ya ki warep ka jylla, neini i daw ka seiñ da lai yachem ko wa ki bor District wow pait bniah ya kani ka kaam.
Da pyntip u wa neiliang u DC da kular u wow chimkhia wei wow phah kem leh ya ki bru kiwa chim kabu ya ki warep wow ah kilo khlem yurim.
Neidaw wa kani ka kaam leh haap ko hapoh i pait yong ka Hima Mylliem, neiliang u Kharsyntiew da pyntip u wa u DC da ong u wa daw thoh u cha u Acting Syiem wow kyntu ya oo wow chimkhia ya ini i chemchitom ki warep.
Ha iwi tawon i liang da pyntip u Kharsyntiew wa i chah ah kilo ya ki mar rep wa da wanrah ha yaaw da poi ko hadooh chiphaw kilo na ka chi churia ki mar rep.
“Lada ah chiphaw kilo na ka chi churia i mar wa em 40 hadooh 50 kilo, ki warep kammon u im ja ki,” da kylli u.
Discussion about this post