Ka Hynñiewtrep Integrated Territorial Organization (HITO) da ujor syndon ko cha u Montri Rangbah ka jylla, u Conrad Sangma yeiwa tyngkheiñ kyndon yada COVID-19 man-i-por da ka sorkar hawa pynman ya ki yalang paidbah kamwa da yoo biang sa chisien heipor wa pynman ya ka Cherry Blossom Festival 2021.
Ka seiñ da ong ko wa ini i tyngkheiñ aiñ da man leh iwa chynna yei wym em biang i pynkhreh heiwa ki kyndon wow psiah cha kani ka tamasa da pynkylla man-ka-sngi khlem da pyntip paidbah wei hawa pyntip paidbah (Advertisement) chaphang ini da leh du ha ar tylli donhi ki kot khubor, heiwa ym em pyntip cha ki laad pathai khubor kamjooh ka chnat sorkar kawa toh u leh yeini.
Kamtæ ha ki rynsan Social Media da mih ki khubor hamsaya wa daw em u Shah Rukh Khan, ka Kangana Ranaut wa u Amitabh Bachan wa daw wan lang ki cha Shillong.
Chooh chooh da ong wa da khyrngiat wow yoo wa ka sorkar da chim bai psiah ko cha ka tamasa wa pynman pyn da ka poisa paidbah. I kiad wa i baam wa da dai leh toh iwa dai syad bha heiwa ym chem leh yei kiad wa da chna pyn hapoh ka jylla.
Da ong leh wym too tipsap i rukom e Ticket heiwa ha ka sngi wa khaddooh toh u chah u psiah chapoh du kiwa em ya ka Wrist Band wa em yei rong yong wa i rong yirngam tangwa da chah waroh kiwa em ya i rong umsoh wa i rong lieh wei ym tip de katwon ngut ki bru wa da psiah ha ki le sngi khlem da pyrkhat ya u jait khlam COVID-19 wa thymme uwa tip kam u Omicron.
Da beiñ leh yei pynyoo bor da ki pulit wow siat da u Tear Gas cha ki paidbah kiwa boon toh kiwa dang khynroo khyllood kiwa da chrai neidaw wa sñiaw ki wa da chah thok ki. Da ong wa ini da yoo sarom wa pynemkaam ka sorkar MDA dei bor ya ki paidbah.
Kamtæ da ong wa hajrong ini da yooluti wa ka sorkar ha kani ka kynti daw pynchitom ko ya kitu ki wym em leh yei kaam yong ki kamjooh kiwa tyngkheiñ ya ka aiñ.
