Ka seiñ HNYF-Southern Ri War Circle da ujor ko cha u Commissioner of Transport ka jylla Meghalaya hajrong i synraan da ki pulit ya ki Truck wa kit moo palat pood wa lai luti na ka yingkieñ Dawki kawa da tlot bha.
Ka seiñ da ong ko wa ha ki ar sngi nadooh ka 7 tarik uni u bnai hawa pyrchang ki dkhot ka seiñ wow pynsangeh ya kini ki Truck, da chem wa ki pulit wa synraan ya kini ki Truck i wym ye mutdur de wa da ki pulit wa kyrchaan ya kam ini i kaam wa man pyrchah ya ka aiñ, kamtæ da kyntu ya u Commissioner wow phah ya ki pulit ka Pynursla Police Station wow pait ki ya kini ki kaam pyrchah aiñ, lym kamtæ ka seiñ daw leh ko yeiwa emkaam pyrchah ya kini kiwa emkti ha kini ki kaam pyrchah aiñ.
Ya kani ka ujor da phah leh cha u SP ka East Khasi Hills District wa cha ka BDO ka Pynursla C&RD Block.
Ha u Naichiphaw 2021, ka seiñ da dep ko wow e FIR ha u OC ka Pynursla Police Station pyrchah ya ka Iarbamon Weighbridge wa em ha Pynursla kawa chah wow lai luti ki Truck wa kit palat pood na kani ka yingkieñ heiwa da em ki Truck wa kit 15-16 Ton deiwa chim leh ya ka bai thaw khia T. 500 kawi ka Truck heithaw T. 150.
Ha u Naiynru uni u snem leh da ujor cha u Enforcement Officer ka Iarbamon Weighbridge, wa chah ko wow lai ki Truck wa kit palat ya ka 9 Ton heiwa kiwa boon ki Truck toh kiwa kit hadooh 16 Ton iwa da booh hei maa ya kani ka yingkieñ Dawki kawa emkaam bha ya ki bru paidbah yow lai yaaw, laai haat kamjooh kiwi de ki kaam wei deiwa wan kini ki Truck wa kit palat pood da wanrah ko leh yei sahkut kari da ki kynta khamtam ha ki sngi wa man yaaw.
