Ka Hynniewtrep Youth Council-Jaiñtia Hills District Unit ynnin ka 15 tarik hapoh i yahkhmat u Environment Secretary u Apdame Papiah deilang wa ki dkhot ka seiñ da lai ujor ki cha u Deputy Commissioner ka West Jaiñtia Hills District hawa yatoh wa ki karkhana chna kari kamjooh leh kiwa leh Welding kiwa em ha waroh ka District.
Ka seiñ da ong ko wa ki paidbah da ood ki wa jakhlia ki umbaam umdih nei tooid ki jakhlia yong kitai ki karkhana cha ka wah Myntdu wa ka wah Umiurem. Neiliang yong ka seiñ ka dap ko dei sñiawkhia hajrong ini neibhah ini da wanrah ko yei eh.
Ka seiñ da ong ko wa i leh kitai ki karkhana daw ktah ko ya i chait i khiah ki paidbah kiwa pynemkaam ya kitai ki wah. Wei lada kitai ki karkhana u pteiñ ki ya itai i pyntooid jakhlia cha kitai ki wah, neiwon u yoh umbaam umdih ki paidbah.
Kamtæ neiliang ka seiñ da kyntu ko ya waroh ki tre kharkhana kiwa chna kari wei Welding kiwa em hapoh West Jaiñtia Hills District wow sñiawbha ki wow chna da i thlu wow pynlang ya ki jakhlia yong ki, lym kamtæ ka seiñ u lai ko da kiwi won ki luti wa rap eh.
