Ka seiñ Jaiñtia Students’ Movement Eastern Region (JSM-ER) hadien wa da dep lai ko wow thooh bniah da ka hi cha ki yung krehkaam sorkar wa em ha East Jaiñtia Hills District kam ha yung krehkaam u District Transport Officer (DTO), Block Development Office (BDO) wa ha ka Public Works Department (PWD) neibhah wa da yoh ujor na ki paidbah wa i rukom krehkaam man i iwa tlot wym biang u chakri ya ki paidbah, kamtæ ha ka 26 tarik uni u bnai da lai e yeiwa da chem namo ka Report cha u DC ka District.
Ka seiñ ha ka Report da ong ko wa da leh ko yeini 9 sngi nadooh ka 8 tarik hadooh ka 16 tarik uni u bnai deiwa lai cha kini ki yung krehkaam sorkar wei da chem em kiwa wan kreh hadooh 12:00 waje pyrdi sngi wei najrong wa slem u wan kreh da pynlut por wow lehke ha ki Mobile Phone wei wow chong ya khana tang tangwa kat u liwan won biang por bha ki. Wei heipor wa wan ki bru yei emkaam, ym em kini ki wakreh heithaw wa toh u chong ki.
Da chem khamtam ha yung krehkaam u DTO da em da ki bru wym toh kiwa kreh sorkar kiwa yaklam wa ki bru wa wan emkaam kiwa da man kam ki Dalal kiwa da chim palatdor ya ki paidbah wa wan wow yaleh Driving License, ki Registration Certificate wa kiwi kiwi de ki kot ki sla kari wei ini da ktah ko chiboon ya ki paidbah.
Ka seiñ da dawa ko wa kiwa kreh sorkar toh u deiñ ki da ki ID sorkar yow pynsuk ya ki paidbah wei wow pyndep hok ki yei kaam yong ki.
Ka seiñ da pynsñiaw ko leh yei emkaam wow booh ha ki Signboard yei dor yong ka bai ki kot bai sla nadooh ki bai yaleh Registration Certificate, ki License, ki Permit kamjooh ki bai pynthymme ya ki kot ki sla, i dor kuna ya kiwa slem wow pynthymme ya ki kot ki sla wa kiwi kiwi de kiwa emkaam u tip.
Neiliang u DC da yaroh u ya ini wa leh ka seiñ wei da kular u chimkhia yeini i kaam yow pynsuk ya ki paidbah.
