Ka JSU-War Jaiñtia Circle haka 19 tarik uni u bnai da ujor ko cha u Lahkmen Rymbui, Minister Incharge (Home & Border Areas Development) ya i pynyieñ chrot yow chna ya i yung khyndaw-bilat (RCC Structure) da ki Border Gaurds of Bangladesh (BGB) hajan u Zero Line yong ka khappood India-Bangladesh wei da wiar leh u Sub Pillar BP No.1273 uwa em ha Wah Umngot hajan ka BSF Camp wa em ha Dawki.
Ka JSU-WJC da yoh yutip ko wa ini i chna toh neibynta wow chong kiwa lai sonteri namo ka Patrol Camp ki BGB wei daw pyndait leh yaki Flood Light.
Ka JSU-WJC da thoh ko, “I sñiawphylla i wa kammon ka BSF kawa em leh yaka Camp hajan heitai hi wa chong pait ko khlem khang ko ya ini. I dawa i wa ka BSF toh u pynche ko ya ini.”
Ka seiñ hei lai sylli yong ka ha uni u bnai da chem ko wa u Sub Pillar yong u BP No.1273 uwa em hajan ini thaw wa em ini i chna katni da wiar u, wei na i daw wa joor i khloh moo, ka madan bol wa em hajan ka wah da sdang ko wow oor wei daw wiar ko.
Ka JSU-WJC ha i yahkhmat u President Eddy Kery Pohtam wa u General Secretary u Kerrydiam Lamin da lai yachem ki leh ya u Assistant Commander ka BOP Dawki wow paan pynche chaphang ini heiwa da jubab wa ya ini i chna da yoh yutip da ki bor wa hajrong wei da sangeh noh ya ini i chna katni.
Ka JSU-WJC da kyntu ko leh ya u montri wow leh iyi iyi ya ini i leh heh ka Bangladesh wei leh wow pynbait noh ya u pood deiwa thung yaki paia yong ka khappood India-Bangladesh katkam wa toh.
