Ka KSU Barato Unit da ujor ko cha ka Divisional Forest Officer, Wildlife Division, Jowai pyrchah yei em i pynyap dusmon ya ki dakha, doh-um ha tymbud yong ka Wah Mynriang heiwa da ya yap da ki hajar tylli dakha kiwa im wa sah ha kani ka wah.
Da ong wa kani ka wah man ko kawi na ki wah kawa heh kawa em haka Elaka Shilliang Myntang kawa em palat 20 tylli ki chnong tangwa iwa sñiawsih toh kini ki chnong ym ye ki wow khanglaad ya ini i leh sih yong ki bru ya kani ka wah kiwa da pynsih dur ya kani ka wah deiwa pynyap dusmon ya kiwa im hapoh yong ka.
Da ong chooh chooh wa kiwa pynyap khiar yaki dakha toh deiwa pynemkaam da ki bomb, kiwa theh bih Tutia kiwa beh kynjun wa kiwi kiwi ki rukom iwa da pynsih pyndooh ya kiwa im ha kani ka wah waroh kawi.
Da pyntip wa ini i leh sih toh ha ki bynta ka wah kiwa haap hapoh ka chnong Barato kiwa nadooh Chem-um hadooh Thwai Chyrngan.
Neiliang kiwa pynlai chnong, ki VDP Chnong Barato, ka seiñ khynroo ka Barato, ka KSU Barato Unit wa kiwi kiwi ki seiñ kreh mon sñiawbha na kiwi ki chnong leh kamjooh, boonsien da pyrchang ki wow thooh wow wanrah yaki laad ki luti wow leh pyrchah, tangwa ym myntoi neibhah da em bait ki bru wa leh pyrchah kiwa pynyoo bor kiwa ym bna iyi iy leh.
Kamtæ neiliang yong ka KSU Barato Unit da booh ko ya kani ka ujor wow yarap lang wow kdooh wow khoom ya kam kini ki kaam pynyap dakha, doh-um wa im ha kani ka wah kamjooh wow thooh ki laad ki luti wow pynneh pynsah ya ki dakha wa kiwi kiwa em ha kani ka wah.
