Jowai: Ka seiñ North East Indigenous People Federation (NEIPF) da thoh ko cha u SP ka West Jaiñtia Hills, East Jaiñtia Hills, East Khasi Hills wa Ri Bhoi District wow ujor pyrchah yei khrong poisa be-aiñ ha ki Check Gate.
Ka seiñ da ong ko wa da yoh ujor ko na kiwa boon ki tre kamjooh kiwa yah truck kiwa lai luti ha ki sarokbah Shillong-Guwahati wa da chah pynbor ki wow su poisa hadooh T. 10,000 nadooh na Lad Sutnga kawa da haap su nyngkong ki T.4000-5000, Mawryngkneng T. 2500, Diengpasoh T. 2500, 8th Mile T. 5000, Sohshrieh T. 5000, Umiam T. 1200, Umling T. 1000, Byrni T. 2500, Khanapara T. 1000 hanlada ym em kit palat pood ya u mooyong.
Ka seiñ da ong ko leh wa ini da jia i na i por cha ki por hadooh da wan paan yarap ki tre truck wa joor i dohnong ki.
Kamtæ da kyrpaad ya ki SP wow chimkhia ki ya ini i kaam deiwa pyrkhat ya ka kamai ja-kpoh ki tre truck wa kiwi kiwa im ja na kani ka kaam.
Discussion about this post