Jowai: Ka Niaw Wasa Youth Federation (NWYF) ynne ka 15 tarik hapoh ka yahkhmat yong u Pynbiang Rymbai, ka seiñ da lai ko wow ujor pyrchah yaka Weighbridge kawa em ha ka chnong Khliehtyrshi, Jowai Bypass Road, hajrong ka yurim wa ka seiñ da chem ko wa kani ka Weighbridge da lai lait ko yaki kyndon yong ka sorkar wei ym em pyrtuid ko ha kiwa da booh daka Mining and Geology yong ka sorkar kamjooh leh wa ym em hok ko wow thaw khia ya ki kari wa lai lyngba utai u sarok.
Ka seiñ da ong ko wa i mih kani ka Weighbridge da sdang yaka khlem da khut Tender lyngba ki laad pathai khubor næ ki Advertisement wei da pynkrehkaam yaka khlem da bood yaki aiñ sorkar.
Da ong leh wa katkam wa da jied ka NGT kamjooh ka sorkar jylla, da tipmit ki yaka Weighbridge wa em ha 7th Mile, West Jaiñtia Hills heithaw kawa em ha u sarok Jowai Bypass neibynta wow thaw ya waroh ki kari kiwa lai lyngba u tai u sarok cheiliang East Jaiñtia Hills District kamtæ kani ka Weighbridge da pynkrehkaam yaka pyrchah yaka aiñ. Ka seiñ da ong ko leh wa da yoo ko da i khmat na i por cha ki por wa em i sahkut kari hadooh da em leh i dooh mynsien bru du nei wym ye u pynkrehkaam wei pynlai ha i dur wa biang.
Kamtæ neiliang ka seiñ hawa yachem wa u khlieh yong ka District da e ko dei thoh wei kyrpaad ko leh wow chimkhia ya kani ka kaam khnang wow em i chong chngaaiñ ha waroh wei neiliang u DC leh da ong u wa daw bichaar ya ini.
Neiliang u President yong ka seiñ da ong u wa daw thooh laad wow thooh yutip lyngba ki RTI wei lada ka sorkar ym chimkhia ko ya ini ym banse wow thooh da kiwi laad næ wow ku cha ki yung lieh yung soo, pynkut ka kyrwoh na u President ka seiñ u P. Rymbai.
