Ka Raij Namdong, Elaka Nongjngi ha ka 5 tarik uni u bnai da ujor ko cha ka Executive Committee ka JHADC pyrchah yei thmu kyntoor pood u Dolloi ka Elaka Nartiang chapoh ka chnong Thadmynri kawa dang haap hapoh ka Raij Namdong, Elaka Nonjngi.
Ha ka ujor da ong ko wa da pyndep ya ka sorjamin ya ki thaw ha ka 20-03-2020 wei da chem wa kini ki thaw em ki hapoh ka Raij Namdong Elaka Nongnjngi wa hapoh ka chnong Namdong-A.
Da pyrchah joor leh yei thmu ka chnong Thadmynri wow wanrah cha u pood ka Raij Namdong khlem tip ki waheh chnong wa ki waheh ka Raij wot ka Elaka leh kamjooh neibhah ya ka chnong Thadmynri toh kawa da pynkha na ka Raij Namdong dang ha kini ki snem wa dadep wei waroh chi kattu em ko hapoh ka Elaka Nongjngi.
Hawa yaklam wa u Publicity Secretary Elaka Nongjngi, u R. Pulang da ong chooh choh u wa ini i kyntoor pood ka Elaka Nartiang da poi i leh chadooh ka chnong Morapushai kawa haap hapoh ka Elaka Nongjngi.
Neiliang ka Elaka Nongjngi da ong ko wa ini waroh da jia i toh neidaw wa tlot na u Dolloi ka Nongjngi.
Kamtæ da kyrpad ya ka JHADC wow chimkhia ko yeini deiwa pynsangeh chwa ya ki kot ki sla ki bru kat wym pu dep pynbait ya u pood ka Elaka neibhah wa da chem wa em ki thaw toh kiwa em ar tylli ki Land Holding (kawi na Elaka Nongjngi wei kawi won na Elaka Nartiang) neibhah deiwa man kamni daw wanrah i yei eh i khoo hadien habood.
