Ka United Democratic Party (UDP), lyngba u State Vice President, u Allantry Franklin Dkhar, ynne da phah u ya ka chithi yow ujor ha u Chief Election Commissioner ka ri pyrchah ya ki MLA kamjooh ki Montri kiwa emyatoh waka NPP deiwa pynbaad wa da pynemkaam bakla ki ya ka FOCUS waka FOCUS+ Scheme.
Ha ka ujor da ong wa da mih khubor wa kini ki MLA wa ki Montri sorkar da pynemkaam bakla ki ya ka FOCUS deilang waka FOCUS+ deiwa saam ya kini ki Scheme ym du cha kiwa toh u yoh myntoi kiwa toh u man ki warep donhi ka Meghalaya.
Ka UDP khlem da pynmih yei pyrtuid yong uwon uwon u MLA lane u Montri sorkar da ko wa kani ka Scheme FOCUS wa FOCUS+ toh ka Scheme yow e yarap kawa da mang T. 200 klur wei da sdang ya ka yow yarap poisa ka sorkar ya ki warep kiwa da chah ktah neidaw ka khlam COVID-19.
Kamtæ da ong wa u Montri Rangbah, u Conrad Sangma ha kini ki 3 bnai da lai u cha kiwa boon ki District wa ki Block yow lai e yarap cha ki seiñ ki warep deiwa saam T. 5000 uwi u dkhot kini ki seiñ heiwa u Conrad da ong u wa kani toh ka poisa wow yarap ya ki warep hei kaam rep yong ki.
Tangwa ka UDP da ong ko wa em leh ki MLA kamjooh ki Montri sorkar kiwa da saam ya kini ki Scheme cha ki thaw wym em i rep i riang, kamtæ ini pynyoo ko wa em i leh bakla ya kani ka Scheme, kamtæ da kyrpaad ya u Chief Election Commissioner wow chimkhia u ya ini i kaam yow pynyikna wa kiwa toh hok u yoh myntoi kiwa man kam ki warep ym dooh ki yei bhah hok yong ki.
