Jowai: Ka seiñ Wildlife and Environment Protection Group (WEPG) kawa na West Jaiñtia Hills District ha kani ka 17 tarik da thoh ko cha u montri rangbah ka jylla u Conrad Sangma wow chimkhia u yei tih mooyong be-aiñ iwa man pyrchah leh ya ka hukum ka National Green Tribunal (NGT).
Ki dkhot kani ka seiñ ha ka chithi da pyntipmit ki kam ki bru wa maya ya ka rymaw wei da pynsñiaw ki boonsien ha ki snem wa da dep yei chah ktah ka rymaw kamjooh ki mrad wa em hapoh yong ka deiwa ong waka NGT ha ka hukum yong ka da ong ko wa i rukom tih mooyong hapoh ka jylla toh iwa be-aiñ.
Kani ka seiñ da ong ko wa hanlada kattæ leh i tih mooyong dang pteiñ hi i iwa da yoo na u mooyong wa em harood u sarokbah NH-40 wa NH-6 iwa pyn hapoh i khmut ka sorkar.
Da pynbaad leh wa ka sorkar jylla yah bakla ko ya ka Supreme Court deiwa booh ya ka bui (Report) wa thok heiyatoh wa u mooyong wa dadep tih wa uwa dang sah wow kit wei lada leh hok waroh uni u mooyong wa dang sah toh uwa dang dep tih ymtoh uwa dang sah wei ka tnat Mining & Geology, Forest & Environment, State Pollution Control Board wa ki bor District ym em leh ki yei kaam yong ki.
Kani ka seiñ da kam ko leh man ka sngi kamwa 130 tylli ki truck kit mooyong be-aiñ wa li noh moo cha ki karkhana pynmih khyndawbilat kiwa em ha East Jaiñtia Hills, West Khasi Hills wei kamwa 200 tylli ki truck man ka sngi da mih ki napoh ka jylla lyngba Checkgate ka sorkar wa em ha Ratacherra ha EJH.
Da kam leh wa lyngba ka Shangbangla Government Checkgate wa em ha Ri-bhoi man ka sngi kamwa 150 tylli ki truck da chah wow lai suk khlem psiah naka Checkgate iwa pynyoo wa em kiwa kreh sorkar wa emkti ha kani ka kaam wei ka sorkar toh u pynchitom ko ya ki.
Kamtæ da kyntu ya ka sorkar wow chimkhia ko ya ki kaam wa bha wa da sdang ko wow yada ya ka rymaw kam wow pynman ya ka No Plastic Zone hapoh ka Secretariat wei wa uwi u bru toh u thung u uwi u dieñ.
Ini toh katkam wa pyntip ki dkhot ka seiñ u B. Buam, u S. Laloo wa u SL Dkhar.
Discussion about this post