Khliehriat: Ki ar tylli ki seiñbhalang na East Jaiñtia Hills District wa kynthup ya ka East Jaiñtia National Council (EJNC) wa ka North East Indigenous People Forum (NEIPF) ynnin ka sngi Thohdieñ da lai ki wow ujor ha u Superintendent of Police ka EJH u Vivekanand Singh hajrong i pynpoor ya ki khubor thok lyngba ka WhatsApp wa da pynbaad wa em kiwa chong chnong kiwa da yoh ya u khñiang Coronavirus ha ki le tylli ki chnong yong ka East Jaiñtia Hills, kitæ ha Umlynsha, Lama wa Deiñsatlang.
Katkam ka ujor wa da soi pyrtuid da u Vice President ka EJNC u Almiki Ryngkhlem wa u Vice President yong ka NEIPF-SEBR u Desefirming Rymbai da dawa joor na ki bor ka aiñ wa toh u takit wei wow thooh yaki bru wa pynpoor ya kam kani ka khubor hamsaia.
U Superintendent of Police u Vivekanand Singh, da pyntip u haki ar seiñ wa lada em kiwon kiwon kiwa yoh kam kini ki jait khubor ha u WhatsApp, toh u lai yachem ki wa u Officer in Charge yong ka Khliehriat Police Station wow e yutip yow booddien ya kiwa pynpoor ya kam kini ki khubor thok.
Neiliang yong kiwa yahkhmat ka EJNC wa ka NEIPF-SEBR ha i emlang u MDC yong ka Bataw-Lakadong u Dr. Sanky Shangpung da pynsñiaw ki yei sñiawkhia hajrong ini i pynpoor ya ki khubor thok heiwa ini da wanrah ko yei pynsyier ya ki paidbah
Neiliang yong u MDC ka Bataw-Lakadong Constituency u Dr. Sanky Shangpung da pyntikna u wa ym em kam ini i jia hapoh ka Constituency yong oo.
Da kyntu u leh yaki paidbah wa ym toh wow ngait ya kam kini ki khubor thok wei ym toh u tieñ næ hær-rngu ya ini iwa da pynboodnaam ya kini ki le tylli ki chnong kiwa haap hapoh ka Bataw-Lakadong Constituency.
Discussion about this post