U Khroo Lamsalanki Pariat uwi na kiwa chong chnong ka Jowai da mih u chakhmat wow paan yutip lyngba ka RTI na ka Jowai Municipal Board (JMB), neibynta u tip wei wow che ki paidbah. Da ong u wa neidaw i kyntait u PIO ka JMB wow jubab yei paan yutip yong oo wot hawa da palat 30 sngi leh, kamtæ da rah ya kani RTI cha u State Chief Information Commissioner (CIC) yong ka sorkar jylla ynne ka sngi.
Ki ar tylli ki yurim wa da ujor u cha u CIC ka sorkar jylla toh hajrong i kyntait wow jubab yaka RTI, iwa ar wow pynchitom wei daiñ kuna ya u PIO katkam ki kyndon ka aiñ RTI.
Da ong u wa hei sakhiat hi katkam ka aiñ yong ka Right to Information Act 2005, da batai che ko wa u PIO toh u jubab u yei paan RTI hapoh 30 sngi, wei lada pynslem palat ya i por wada booh, toh u daiñ kuna kamwa T. 250 chi sngi, wei katkam ka aiñ wa lada ym e jubab hadien wada kut 30 sngi, mut wada kyntait yaka RTI.
“I poi paan yaka RTI toh hadien wa i kam kiwa chong chnong ka Jowai wa chaniah haka Municipal wow wan kit yaki jhep naki yung ki sem, chem i wa yaka thaw noh jhep ha Mynkjai da khang, wei hadien wa khang da pynsah hei doom ya waroh, heiwa neiliang ki synjuk waheh chnong leh da yaklam ki waka sorkar neibynta u pynbiang thaw noh jhep. Neitæ won i pynsñiaw na ki paidbah, wei hadien i yaklam da rai wow paan da ka RTI khnang yow tip lut iyi wa em ha lyndet ini i eh,” ong u Pariat.
Khana u wa yaka RTI da li booh u haka 07-05-21, tangwa hadooh ynne ka sngi ym pu em yoh u yei jubab, kamtæ sñiaw u wa ini toh i kaam wa u paidbah toh u tip u hajrong kiyi ki kaamram yong ka Jowai Municipal Board.
Da kylli haroh u wa em hi mo iwa hap u murieh hawa da boon snem ki paidbah chaniah ki hei chakri yong ka Municipal wei najrong wa u paidbah da su u yaka bai jhep man-u-bnai.
Ki yutip wa u Pariat da paan u toh hajrong i daw wa pynmnjur yaka sorkar jylla u chna næ booh yaka Jowai Municipal Board ha Jowai, wa ki aiñ wada pynkup bor yaka sorkar u pynman yaka Municipal.
Neitæ lada ka JHADC da e bor ko mo yaka sorkar jylla u booh yaka Municipal ha Jowai wei nadooh ynnu da booh yaka. Paan haroh u yei yutip wa bniah hajrong i rukom krehkaam ka Municipal, i bor yong ka, u pood u ang yong ka, ki pyrtuid chnong wa pdiang wa ki wym em pdiang yaka Municipal.
Da paan yutip haroh u ya ki daw wa ka sorkar jylla wym em su tulop ko cha ki wakreh yong ka. Wei kamjooh em hi mo ka dan wa kiwa chong chnong hap su ki cha ka Municipal neibhah kamwa tip T. 100 chi bnai da khrong na u paidbah, wa kiwi de ki phang wa da paan yutip u hajrong ka Municipal.
