Ujor uwi cha ka CS wow dawa pyndam yei e bor yaka Jai Maa Coal wow chalan mooyong cha Bangladesh

Uwi na ki bru wa kreh mon sñiawbha, uwa tip kam u Kingstone Bolwari da thoh u cha ka Chief Secretary ka Meghalaya yow pyrchah yei e bor ya ka Jai Maa Coal Private Limited wow kit wei yow chalan ya u mooyong wa da dep tih wa em ha Gasupara cha Bangladesh.

U Kingstone da pyntip u wa ka chnat Mining & Geology ka Meghalaya ha ka 28-04-22 da e bor ko ya ka M/S Jai Maa Coal Pvt. Ltd heiwa u DC ka South Garo Hills leh da pynmih u ya ki kyndon ha ka 29-04-22 kammon wow chalan ya uni u mooyong wa em ha Gasupara cha Bangladesh.

Tangwa neiliang uwa ujor da ong u wa da e bor leh wow wanrah ya u mooyong na baar ka jylla yow lai lyngba ka Gasupara Land & Custom Station cha Bangladesh heiwa kamwa man kattæ ym em mooyong wa dang sah ha Gasupara wei ini daw e laad ko wow chalan tooh ya u mooyong wa tih thymme na South Garo Hills cha Bangladesh.

Da kdaw leh wa ym em thaw wow pait hadooh katwon tylli ki Truck wa lai luti man-ka-sngi wei deiwa e bor kamni daw pynchlur yei tih mooyong pyrchah ya ka aiñ deiwa kam wa u mooyong wa chalan toh uwa wan na Assam lane na kiwi ki jylla iwa daw man i dooh nong ya ka Meghalaya.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Chooh chooh da ong wa ka High Court ka Meghalaya dang dep pynmih hukum ko yow khang yei tih mooyong pyrchah ya ka aiñ hapoh ka jylla wei wow bood ya ki kyndon wa da pynmih da ka NGT kamjooh ka Supreme Court ka ri.

Kamtæ da ong wa ini i e bor ya ka Jai Maa Coal Pvt. Ltd man ko leh khlem da dep chwa wow chim yukheiñ yow pynsakhiat yei kam ka Jai Ma Coal hadooh katwon em mooyong.

Da khana leh wa u tre ka Jai Ma Coal Pvt. Ltd u Balwan Bhama toh uwa da chah pynbaad kam uwa chna da ki kot ki sla thok iwa daw pyndooh nong ya ka jylla heiwa heiyatoh wa ini da em leh ka FIR wa da e ha ka Basistha Police Station, Case No. 2022 u/s 120B/420/468/471 IPC heiwa u Balwan Bhama da dep u wow chah kem ha ki pulit ka Basistha Police Station wei ha ka takit da chem wa u Youdhistra Bahrma toh u tre ka M/S Jai Maa Coal Private Limited tangwa u Balwan Bhama toh uwa pynlai ya ki kaam ki jaam wei da chem leh yei leh thok wa da poi hadooh T. 52.80 lak.

Hajrong ini waroh da dawa naka Chief Secretary wow pyndam noh ya ka hukum wow e bor ya ka Jai Maa Cola Privtae Limited wow chalan mooyong cha Bangladesh lyngba ka Gasuapara.