U Riksohki Suchiang uwa chong chnong ka chnong Nongkynrih, West Jaiñtia Hills, da ujor u ha u DFO, (T) pyrchah ya ki Saw Mill wa krehkaam pyrchah yaka aiñ wa em ha East wa West Jaiñtia Hills District deiwa dawa wow lai khang noh ya kini.
Ya ka ujor wa nyngkong da e haka 10-11-22 wei hadien wym em leh iyi iyi leh da ka yung krehkaam u DFO, da lai pynkynmoo biang haka 6 tarik uni u bnai deiwa thoh biang cha u DFO hajrong ini i jooh i kaam.
U Riksohki da ong u wa neidaw wym chimkhia ka chnat Forest nadooh u DFO wa ki Rangers tæ joor mih ki karkhana ah dieñ pyrchah aiñ ha Ri-loom Jaiñtia kiwa katkam wa yoo u da em ki kamwa 500 tam ki wym em ki kot ki sla wa biang, ki wym bien ka yung krehkaam u DFO kamjooh ka chnat Forest wow lai khang ki.
Da ong u leh wa em boon ki kari Assam kiwa wan kit dieñ na kini ki Saw Mill kiwa krehkaam pyrchah aiñ, deiwa beiñ joor u leh ya ki khyrdop namo ki Check Gate yong ka chnat Forest kiwa em hapoh Ri-loom Jaiñtia kiwa da man pathan kam ki Dalal ya kitai ki kari Assam kiwa wan kit dieñ na kitai ki karkhana ah dieñ pyrchah aiñ.
Kamtæ da dawa wei da ban joor u ya ka chnat Forest wa em ha Jowai wow khang noh chisyndon ya kini ki karkhana ah dieñ pyrchah aiñ wa em hapoh Ri-loom Jaiñtia.
U Riksohki da maham u wa lada ym khang ya kini ki Saw Mill wa krehkaam pyrchah ya ka aiñ daw lai choh u haka dwar ka yung kasari wa emburom ka jylla.
